Соҳа вакилларининг фикрича, инсон мияси мушакка ўхшайди – қанча кўп ишлатилса, шунча фаоллашади. Бирор хорижий тилни ўрганиш инсон миясидан нафақат қоидалар ва луғат билан танишишни талаб қилади, балки унга бу билимларни эслаб қолиш ва тўғри қўллаш вазифасини ҳам юклайди.

Мамлакатимизда 30 ёшгача бўлган ёшлар 19 миллиондан ортиқ ёки аҳолининг 55 фоизини ташкил қилади. Меҳнат бозорига ҳар йили 600 минг ёшлар кириб келаётган бўлса, келгуси 10 йилда бу рақам 1 миллионга етади. Шунингдек, чет элда таълим олаётган ва меҳнат фаолиятини олиб бораётган йигит-қизлар сафи йилдан-йилга кенгаймоқда. Бу борада уларга хориж тилини мукаммал ўрганиши учун барча имкониятлар тақдим этилган.  

Жорий йилнинг 27 июнида давлатимиз раҳбарининг “Ёшларни хорижий тилларга ўқитиш тизими самарадорлигини ошириш бўйича қўшимча чора-тадбирлар тўғрисида”ги қарори қабул қилинди.  

Мазкур ҳужжатга асосан, имтиҳон топшириш харажати қопланадиган халқаро имтиҳон тизимлари бўйича инглиз, немис, француз, корейс, хитой ва япон тилларидан камида С1 ёки унга тенглаштирилган мос даражадаги сертификат олган ёшларнинг имтиҳон топшириш харажатларини компенсация қилишга қўшимча равишда ўқиш харажатларини қоплаш учун БҲМнинг 3 баравари (1 млн 20 минг сўм) миқдорида бир марталик моддий рағбатлантириш тизими жорий этилади.  

2024 йил 1 сентябрдан 2027 йил 1 январгача ёшларнинг немис, француз, корейс, хитой ва япон тиллари бўйича халқаро имтиҳон тизимларида имтиҳон топшириш харажатлари қоплаб берилиши учун улар томонидан тўпланиши лозим бўлган баллнинг (сертификат даражасининг) минимал кўрсаткичи бир поғона пасайтирилади. 

Умумий ўрта таълим муассасаларининг синф хоналарини таълим жараёнидан бўш вақтда касб-ҳунар ва хорижий тилларни ўқитиш фаолиятини амалга ошириш учун тўғридан-тўғри шартномалар асосида текин фойдаланиш ҳуқуқи билан хусусий ўқув марказларига беришга рухсат этилади.  

Бунда тегишли умумий ўрта таълим муассасаларининг рўйхати Мактабгача ва мактаб таълими вазирлиги томонидан тасдиқланади. 

Муҳайё Тошқораева,  

ЎзА