Янги корхона иш бошлади
Навоий шаҳрида “Navbahor tekstil” масъулияти чекланган жамияти шаклидаги чет эл корхонаси иш бошлади. Ип-калава ишлаб чиқаришга ихтисослашган корхона маҳсулотларининг асосий қисми экспорт қилинади.
Президентимиз раҳнамолигида енгил саноат тармоғини ривожлантириш, тўқимачилик корхоналари фаолиятини қўллаб-қувватлаш ва пахта хомашёсини қайта ишлашни янада кенгайтиришга алоҳида эътибор қаратилмоқда. Натижада тармоқ корхоналари сони йилдан-йилга кўпайиб, ишлаб чиқариш ҳажми ортиб бораётир.
– Йилига 5 минг 400 тонна пахтани қайта ишлаш қувватига эга корхонада 200 нафар аҳоли иш билан таъминланди, – дейди корхона директори Шерзод Жумаев. – Жорий йилда тайёрланадиган 1 миллиард 300 миллион сўмлик ип-калаванинг 80 фоизини экспортга чиқариш режалаштирилган.
Мамлакатимизда бўш турган иншоотлардан мақсадли фойдаланишга қаратилган саъй-ҳаракатлар ўз самарасини бермоқда. Бу борада Ўзбекистон Республикаси Вазирлар Маҳкамасининг 2014 йил 3 июлдаги “Давлат мулки объектларини кичик бизнес ва хусусий тадбиркорлик субъектларига сотиш борасидаги қўшимча чора-тадбирлар тўғрисида”ги қарори муҳим омил бўлаётир. Мазкур корхона ҳам фойдаланилмай турган бинони реконструкция қилиш эвазига ташкил этилди. 10 миллиард 498 миллион сўмлик чет эл инвестицияси жалб қилинган корхонада ишчи-хизматчиларнинг самарали меҳнат қилиши учун барча шароит яратилган.
Кейинги йилларда вилоятда пахта етиштириш, янги навларни яратишга алоҳида эътибор қаратилмоқда. Ҳудудда етиштирилаётган “Бухоро-6”, “Бухоро-102”, “Ан-боёвут-2”, “Султон” навлари ички ва ташқи бозорда харидоргирлиги билан ажралиб туради. Толасининг узунлиги, рангининг тозалиги хомашёнинг саноатбоплигини белгилайди. Жорий йилда вилоятда “Порлоқ”, “Тўрақўрғон-4” каби навлар синовдан ўтказилмоқда.
Навоий вилоятида йилига 100-110 минг тонна пахта хомашёси етиштирилади. 2013 йилда бу ерда 18 миллион АҚШ долларидан ортиқ қийматдаги ип-калава ишлаб чиқарилиб, экспорт қилинди. Айни кунларда вилоятда йиллик 18 минг 300 тонна ип-калава ишлаб чиқариш имконияти яратилди. Бу қарийб 55 минг тонна пахта вилоятнинг ўзида қайта ишланади, демакдир.