Қишлоқ хўжалиги вазири Иброҳим Абдураҳмонов Сирдарё вилоятига ташрифи давомида Гулистон туманидаги “Орол неъматлари” кўп тармоқли фермер хўжалигига қарашли иситгичсиз иситиладиган 50 сотихлик иссиқхона фаолиятини кўздан кечирди.

Мазкур ҳудудда “Орзу” навли бодринг кўчатлари экилган бўлиб, ҳозир уни парваришлаш ва етиштиришга оид агротехник амалиётлар олиб борилмоқда. Маълум бўлишича, иссиқхона ичида томчилатиб суғориш тизими тўлақонли жорий этилган.

Шунингдек, масъуллар томонидан фермер хўжалигига қарашли боғ ҳудудида ҳозир павлония дарахтлари экилганлиги айтиб ўтилди. Бундан ташқари, боғдорчилик, чорвачилик ва пахтачилик йўналишларида ҳам кенг кўламли ишлар олиб борилаётгани таъкидланди.

Вазир бу ердаги умумий фаолият билан танишар экан, амалга оширилаётган агротехник амалиётларни ижобий баҳолаб, ҳар бир ердан унумли фойдаланиб, етиштирилаётган қишлоқ хўжалиги маҳсулотлари кўламини ошириш бўйича вазифалар белгилади.

Шу билан бирга, мутасаддиларга иссиқхоначиликда инновацион ёндашувларни сифат даражасида қўллаш, томчилатиб суғоришга алоҳида эътибор қаратиш ҳамда экинларни етиштириш жараёнида зарур агротехник тадбирларни доимий назоратга олиш бўйича қатор топшириқлар берилди.

Ғулом Примов, ЎзА мухбири