"UzAuto Motors" компанияси ахборот хизматининг маълум қилишича, компания сайти киберҳужумга учраган.
22 декабрь куни UzAutoSavdo тизимида соат 10:00 дан бошлаб қатор ташқи таъсирлар кузатилди ва бунинг натижасида тизимга мурожаатлар сони 1 сонияда 50 000-60 000 га етди.
UzAutoSavdo тизимига автомобиллар учун контрактация бошлангандан сўнг қилинган давомли киберҳужумлар, авторизация сўровларини қайта ишлашда муаммоларни юзага келтирди. Бу ўз навбатида, онлайн савдо тизимининг тўлиқ блокланишига олиб келди.
Носозликларни бартараф этиш ва ишлашини таъминлаш бўйича техник ишлар амалга оширилди. Киберҳужумлар ўрганилиб, тергов учун керакли тузилмаларга юборилди, дейилади хабарда. Оммабоп автомобиллар учун савдо бугун, соат 14:00дан очилади.
Маълумот ўрнида айтиш жоиз, жорий йилнинг 22 декабрь куни Chevrolet Cobalt, Damas ва Labo автомобиллари учун контрактация очилганди. Аммо онлайн тарзда амалда шартнома расмийлаштиришнинг иложи бўлмади. Фойдаланувчилар на сайт, на илова орқали шартнома олиб бўлмаётгани ҳақида маълум қилишган.
Ш.Маматуропова, ЎзА