Фарғона вилояти Бувайда туманилик Расулжон Камолов ташкил этган уй-музейдан нафақат туман тарихи, шу билан бирга узоқ тарихдан ҳикоя қилувчи экспонатлар ҳам ўрин олган.

Улар орасида турли даврларга оид хумлардан тортиб, мусиқа асбоблари, пластинкаларни ҳам кўриш мумкин. Расулжон ота хонадонига ташриф буюрган ҳар қандай киши ўзини ўтмишга қайтгандек ҳис қилади.

– 8-синфда ўқир эдим. Ўшанда мактабимизда олти ойлик телерадио-усталар курси очилганди. Курсда ўқиб, магнитофонларга лента ёзишга ишқибоз бўлганман. Экспонатларни йиғиш ўша пайтдан бошланган, – дейди 72 ёшли Расулжон ота Камолов. – Мана, ҳозиргача қаерда, қандай тарихий буюм кўрсам, йиғиб юраман. Уй-музейимда мингга яқин буюмлар бор. Менга уларнинг ҳар бири қадрли. Шунинг учун бу буюмларни кўз қорачиғимдек асрайман.

Расулжон отанинг уй-музейида Ҳалима Носирова, Саодат Қобулова каби хонандаларнинг жонли овозлари ёзилган 400 га яқин эски пластинкалар сақланмоқда. Коллекцияларнинг асосий қисмини мусиқа асбоблари ташкил этади. Жумладан, 200 йиллик тарихга эга дутор, нақшлар билан безатилган уйғур танбури, сурнай, най, кумуш нақшли бахшилар дўмбираси, магнит тасмалар, кўп йиллик магнитофонлар бор.  

[gallery-21198]

– Мана бу танбур ҳам мен учун жуда қадрли. Қадрлилиги шундаки, айнан шу танбурни халқнинг суюкли  ва ардоқли санъаткорлари маҳорат билан чалган, – дейди Расулжон ота қўлига эски танбурни олиб. – Ушбу танбурни тошкентлик таниқли уста Зуфаровларнинг бобоси 1950-60 йилларда Жўрахон Султонов учун махсус ясаб берган. Бу танбурни Жўрахон Султоновдан Орифхон Ҳотамов олган. Кейин Расулқори Мамадалиев чалган. Ундан кейин “Фарғона тонг отгунча” қўшиғининг муаллифи Абдулатиф Холдоровга теккан. Энди эса менинг қўлимда...  

<iframe width="640" height="420" src="https://www.youtube.com/embed/E10J8hhsH5w" title="Uyida muzey ochgan otaxon" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Шунингдек, уй-музейдан сўзана, қўлда тикилган қадимги гул-сочиқлар, чопонлар, зарбоф либослар, араб ҳарфларидан нақш қилиб ишланган кумуш тақинчоқлар, паранжилар, жуда кўп ноёб китоблар ҳам жой олган.

Муқимжон ҚОДИРОВ (сурат, видео), ЎзА