Атрофга назар солсак, янги, замонавий хонадонлар, завод ва фабрикалар, темирйўл ва автомобиль йўллари, электростанциялар ва бошқа кўплаб янги иншоотларга кўзимиз тушади.

Атрофга назар солсак, янги, замонавий хонадонлар, завод ва фабрикалар, темирйўл ва автомобиль йўллари, электростанциялар ва бошқа кўплаб янги иншоотларга кўзимиз тушади. Улар қурувчиларимизнинг меҳнати самарасидир. Келгусида бу борадаги ишлар сифатини янада оширишда Хитой тажрибасини кўллаш, улар билан ҳамкорлик қилиш масалалари кўриб чиқилмоқда.

Бу бордаги тажрибалар ва ҳамкорлик ҳақида Ўзбекистон қурилиш вазирининг биринчи ўринбосари Шерзод Ҳидоятов қўйидагиларни сўзлаб берди.

– Хитой қурилиш соҳаси ва шаффоф қурилиш электрон тизими бўйича дунёдаги энг илғор мамлакат ҳисобланади, – дейди Ш. Ҳидоятов. – Хитой тажрибасини ўрганиш борасидаги илк қадамлар сифатида электрон тизимни амалиётга татбиқ этишни бошладик. Хитойлик ҳамкасбларимизнинг шу йўналишдаги тажрибалари билан танишиб, қайси жиҳатларни ўзимизга мослашда бориб кўрганимиз жуда муҳим.

Чунцин шаҳри Хитойнинг энг ривожланган ҳудудларидан бири саналади. Вакилларимиз мазкур шаҳарда қандай лойиҳалар амалга оширилгани билан яқиндан танишиб қайтди. Эндиликда, халқаро илғор тажриба билан яқиндан танишиб, замонавий лойиҳаларни ўз кўзлари билан кўрган экспертлар ватанимизга қайтиб маҳаллий мутахассисларга, айниқса ёшларимизга ҳам худди шундай халқаро андозаларга мос бўлган креатив лойиҳаларни ишлашлари учун муносиб шароит яратган ҳолда зарур ўринларда уларга кўмак беришлари, қўллаб-қувватлашлари лозим бўлади.

Хитойда қарийб уч минг нафар ходимга эга бўлган йирик лойиҳа институти фаолияти билан ҳам яқиндан танишдик. БИМ технологияда ишловчи мазкур институт лойиҳалари ҳар қандай кишини ҳайратлантиради, очиғи. БИМ технологияси бу — қуриладиган бино ва иншоот лойиҳаси барча жиҳатларни бир пайтнинг ўзида қамраб олган ҳолда электрон тарзда яратилади ва бу табиийки, кейинчалик юзага келадиган бир қанча тушунмовчиликларнинг олдини олади.

Хитойнинг мазкур йирик ташкилоти билан бизнинг лойиҳа институтлари ўртасида ҳамкорлик меморандумлари имзоланди. Чунки, ҳар қандай илғор назария амалиёт билан мустаҳкамлансагина кутилган натижани беради. Шу маънода, айтишим мумкинки, 2020 йилнинг иккинчи чорагида Хитойнинг 20 нафар етакчи лойиҳачиси ўз тажрибалари билан ўртоқлашиш учун Ўзбекистонга келади. Ўз навбатида бизнинг ҳам 20 нафар мутахассисимиз малака ошириш учун Хитойга юборилади. Бу каби кадрлар алмашинуви эндиликда мунтазам равишда амалга оширилади.

Хитойнинг Чунцин шаҳри ҳокимияти вакиллари билан бўлган учрашувимиз ҳам самарали кечди. Ҳокимлик вакиллари бизга ўз тажрибалари ҳақида сўзлаб беришди. Уларда қурилиш ишларидаги лойиҳалаш, шаҳарсозлик бош режалари, қурилишдаги назорат ишларининг барчаси ҳокимият ваколатида экан.

Қайд этиш керакки, жорий йилда вазирлигимиз геопартал ишлаб чиқиб, амалиётга жорий этамиз. Бунда ҳам Хитой анча етакчи бўлиб, уларда 3Д форматида ишлаб чиқилганига гувоҳ бўлдик. Яъни қурилаётган бино ва иншоотнинг лойиҳасида у ишга тушганда қанча ишчиси бўлади, маблағ айланмаси, даромади ва ҳаттоки ундан тушадиган солиқ миқдори-ю, сарф қиладиган электр-энергия каби барча-барча жиҳатлар қамраб олинар экан.

Яқинда Хитойнинг Чунцин шаҳри маъмурияти билан ҳамкорлик меморандуми имзолаш ниятимиз бор. Бунда қурилишда назорат ва экспертиза ишларини амалга ошириш борасидаги Хитойнинг илғор тажрибасининг энг самарали жиҳатларини ўзимизда қўллаш назарда тутилмоқда. Хитойлик ҳамкасбларимиз фаолияти билан яқиндан танишгач, шунга амин бўлдикки, қурилишда назорат ишларини амалга ошириш ва шаффофликни таъминлашнинг электрон тарзда амалга ошириш борасида улардан ўрганишимиз зарур бўлган жиҳатлар етарлича экан.

Мақсад аҳолига арзон, сифатли уй-жойлар ва ижтимоий объектларни қуриш эканини инобатга олсак, қурилиш соҳаси ходимларининг дунёнинг илғор мамлакатлари тажрибасини яқиндан билган ҳолда ўзимизда уни қўллай олишлари ўта муҳим бўлган зарурий омилдир.