Андижон давлат университетида «Карьера куни» тадбири бўлиб ўтди.

Тадбирда университет битирувчи талабалари, профессор-ўқитувчилари, Андижон вилояти Мактабгача ва мактаб таълими бошқармаси масъуллари, бошқарма тасарруфидаги умумтаълим ҳамда ихтисослаштирилган мактаблар раҳбарлари, иш таклиф этаётган корхона ва ташкилотлар вакиллари иштирок этди.

Дастлаб иш берувчиларнинг битирувчи талабалар билан учрашуви бўлиб ўтди. Учрашувда сўз олган Андижон давлат университети, Андижон вилояти Мактабгача ва мактаб таълими бошқармаси мутасаддилари битирувчи талабаларни муборакбод этиб, келгуси ишларида омадлар тилади, шарафли касбда самарали фаолият юритишларига ишонч билдирди. 

[gallery-17459]

Учрашувда иш берувчилар томонидан бўш иш ўринлари бўйича тақдимот ўтказилди. Унда вилоятнинг туман ва шаҳарларидаги вакант иш ўринлари ҳақида маълумотлар берилди. Шунингдек, иш берувчилар талабалар билан бевосита суҳбатда бўлди. 

Тадбир доирасида битирувчи талабалар бандлигини таъминлаш мақсадида ташкил этилган “Меҳнат ярмаркаси”да зарур кадрларни ишга танлаб олиш ва ўзаро манфаатли шартномалар расмийлаштириш юзасидан тавсиялар берилди. 

“Карьера» куни” доирасида «Таълим кўргазмаси» ўтказилди. Университет кафедралари томонидан ташкил этилган кўргазмаларда профессор-ўқитувчилар ҳамда талаба- ёшларнинг эришган ютуқлари, илмий тадқиқотлар натижалари, университет ўқитувчи ва талабаларининг ўқув қўлланмалари намойиш этилди.

Ф. Убайдуллаев, З. Умрзоқов (сурат), ЎзА мухбирлари