Президентимизнинг 2020 йил 27 майдаги «Кўп квартирали уйларни улуш киритиш асосида қуриш жараёнини тартибга солиш чора-тадбирлари тўғрисида»ги қарорига мувофиқ, кўп квартирали уйларни улуш киритиш асосида қуриш учун жисмоний ва юридик шахслар (улушдорлар)нинг маблағларини жалб қилиш фақат юридик шахс мақомига эга бўлган ва улуш киритиш асосида қуриш учун маблағларни жалб этувчи қурувчиларнинг электрон рўйхатига киритилган қурувчилар томонидан амалга оширилади.

Маблағларни жалб қилиш учун қурувчи ва улушдор ўртасида шартнома тузилади ва белгиланган тартибда ҳисобга қўйилади. Қурувчилар қурилиш-монтаж ишларини ўз кучи билан ёки қурилиш-пудрат ташкилотларини (бош пудратчини) жалб қилган ҳолда амалга ошириши мумкин. Бунда бош пудратчи қурилиш-монтаж ишларини олиб бориш учун ишлар (хизматлар) қийматининг камида 30 фоизини ўз кучи билан бажариш шарти билан субпудрат ташкилотларини жалб қилиши мумкин.

Миллий матбуот марказида Қурилиш вазирлиги томонидан мазкур қарор мазмун-моҳиятига бағишланган матбуот анжуманида шу ҳақда сўз борди.

Қайд этилганидек, қарорга мувофиқ Қурилиш вазирлигида улуш киритиш асосида қурувчиларни рўйхатдан ўтказиш бўлими ташкил қилиниб, қурувчиларни рўйхатдан ўтказиш учун www.rd.mс.uz электрон платформа ишга туширилди. Барча ҳудудларда уй-жой қурувчиларига улуш киритиш асосида қуриш бўйича шартномаларни рўйхатдан ўтказиш юзасидан огоҳлантириш хатлари юборилган. Бугунги кунга қадар жами 44 та қурувчи ташкилот шартномаларини рўйхатдан ўтказиш бўйича мурожаатлар келиб тушган бўлиб, барчаси рўйхатдан ўтган. Улар билан тизимли мониторинг ташкил қилинган ва мунтазам алоқалар йўлга қўйилган.

Матбуот анжуманида ҳудудларда рўйхатдан ўтмаган тадбиркорларга барча ҳудудий қурилиш бош бошқармалари томонидан огоҳлантириш хабарномалари юборилаётгани қайд этилди. Ўз навбатида, 2 минг 816 нафар улушдорнинг ҳуқуқий муносабатлари – шартномаларини рўйхатга олиш орқали тартибга солишга эришилди. Улуш киритиш асосида қуришнинг яна бир афзал томони, улушдорларнинг маблағлари қурувчининг ҳар бир қурилиш мажмуаси бўйича алоҳида банк ҳисобварағида жамланишидир. Яъни, фақат қурувчи ва улушдорлар ўртасида тузилган шартномалар бўйича мажбуриятларни бажариш мақсадлари учун йўналтирилади. Қурувчининг бошқа қурилишларига ажратилмайди.

Олдинги уй-жой қурилиш тартибидан юқоридаги қарор асосидаги қурилишнинг қандай фарқли жиҳатлари бор?

– Шу вақтга қадар улуш асосида уй-жой қурилиб келинаётган эди, – дейди Қурилиш вазирлиги бошқарма бошлиғи Шерзод Содиқов. – Аммо уни тартибга солувчи ҳужжат бўлмаган. Бугунга келиб мана шу механизм яратилди. Яъни бу ерда пудратчининг вазифаси нимадан иборат, мулкдорларнинг вазифаси нимадан иборатлиги тартибга солинган. Илгари жуда кўплаб уйлар маълум бир даражага етгандан кейин қурилмасдан чала қолиб кетган. Бундан фуқаролар норози бўлар, берган маблағини қайтариб ололмаган пайтлар ҳам бўлган. Бу ерда ҳар бир кишининг жавобгарлиги ва вазифаси аниқ белгиланган. Энг асосий ўзгариш мана шулардан иборат.

Матбуот анжуманида ўтган уч йилда 104 мингта оила уй-жой билан таъминлангани бу сўнгги ўн йил ичида қурилган уйлар сонидан бир ярим баравар кўп эканлиги қайд этилди.

Шаҳноза МАМАТУРОПОВА, ЎзА