Туркияда ёз бошлангандан бери содир бўлган ўрмон ёнғини сони ўтган йил июнь ойига нисбатан тахминан беш баробар кўп. Бу ҳақда мамлакт ўрмон хўжалиги бош бошқармаси маълумот берган.

Расмий статистикага кўра, 2024 йил 1-21 июнь оралиғида 399 бор ўрмон ёнғини кузатилган, ўтган йилнинг шу даврида мамлакат ўрмонларида 84 марта олов чиққани аниқланган.

2023 йил олтинчи ойи дастлабки уч ҳафтасида ёнғин оқибатида 41 гектар ўрмон зарар кўрган бўлса, жорий йил июнь бошидан буён айни кўрсаткич 2548 гектарга етди.

Ёз бошланиши билан ўрмон ташқарисидаги ҳудудлар ёниши ҳолати ҳам кескин ортиб, бу борада сўнгги уч ҳафталик кўрсаткич 551 тага етди. Ҳисобот даврида 155 жойдаги ўт ўчирилган.

Мутахассислар июнь ойида ёнғин сони кўпайишини, одатда, июль-август ойларига хос бўлган кучли жазирама билан боғламоқда.

Туркия ҳукумати аввалроқ ўрмонларга киришни тақиқлаб, ёнғинга олиб келадиган инсон омили хавфини камайтиришга ҳаракат қилган эди.