-

Кеча Президент Дональд Трамп агар 50 кун ичида Россия ва Украина ўртасида ўт очишни тўхтатиш бўйича келишувга эришилмаса, АҚШ РФ товарларига 100 фоиз миқдорида бож белгиланиши ва Россия нефтини сотиб олган мамлакатларга иккиламчи санкция жорий этилишини маълум қилди. Кўпгина оммввий ахборот воситалари санкция қайси маҳсулотларга тегишлилиги ҳақида турлича фикр айтмоқда. Масалан, “Washington Post” Оқ уй расмийсига таяниб, АҚШ режаси Россиянинг нефть, газ ва бошқа энергетика ресурслари харидорларига таъсир кўрсатишини тахмин қилмоқда.

АҚШ етакчисининг бу қарори Европа Иттифоқини ҳам ҳушёр торттирди. Кутилганидек, Иттифоқ дипломатияси раҳбари Кая Каллас Трампнинг Россия – Украина можароси бўйича келишувга эришиш учун муддат қўйганини олқишлади. Фақат унинг фикрича, 50 кун белгиланиши нотўғри, чунки бу узоқ муддат.

Каллас журналистлар билан учрашувда “Бир томондан, Трамп Россияга нисбатан қатъий позиция эгаллагани ижобий ҳол. Бошқа томондан 50 кун жуда узоқ вақт”, деди.

БМТ Бош котиби Антониу Гутерриш Трампнинг Россияга қарши санкция қўллаш таҳдидига изоҳ бераркан, шундай деди:

– Таъкидлаган бўлардимки, биз учун энг зарури – зудлик билан ўт очишни тўхтатиш. Бу БМТ идоралари резолюциялари, халқаро ҳуқуқ ва низомга асосланган сиёсий ечимга йўл очади. Мақсадга яқинлаштирадиган ҳар бир қадам муҳим, албатта. Қачонки, халқаро ҳуқуқ нормаларига мувофиқ амалга оширилса.

Маълумки, аввалроқ Трамп АҚШ ва ЕИ Киевга қурол етказиб бериш бўйича келишувга эришгани, бу жараёнда зарур харажат Европа зиммасига тушишини айтган. Ушбу таклифни Германия ҳам қўллаб-қувватламоқда.

– Президент Трамп муҳим ташаббус билан чиқди: агар европалик ҳамкорлар молиялаштирса, АҚШ Украинани кўп миқдорда қурол-яроқ билан таъминлайди, – деди Канцлер Фридрих Мерц. – Мазкур масалани сўнгги кунларда Президент Трамп билан бир неча марта муҳокама қилдик. Мен уни ишонтириб айтдимки,  Германия бу борада ҳал қилувчи рол ўйнайди. Биз буни ўз манфаатимиз учун қиляпмиз. Айни ҳаракат Украинанинг Россияга қарши туриш имкониятини оширади. Бу Москвага босимни кучайтиришнинг ягона йўли, токи ниҳоят тинчлик музокараси бошланса. Охир-оқибат хавфсизлик соҳасидаги ҳамкорлар сифатида бирга ҳаракат қилаётганимизни намойиш этяпмиз. Энди тафсилотга тезда аниқлик киритамиз. Шу мақсадда ҳамкорлар билан алоқа ушлаб турамиз.

Ўз навбатида Кремль Украинага қурол етказиб бериш муаммони ҳал қилишга тўсқинлик қилиб, НАТО давлатларини тўғридан-тўғри можарога жалб қилаётганини таъкидлаб келади. Россия томони фикрича, Ғарб Украинани қурол билан таъминлаб, “ўт билан ўйнашяпти”.

С.Раҳимов, ЎзА