АҚШ етакчиси Дональд Трамп пайшанба куни Оқ уйда бўлиб ўтган матбуот анжуманида айтишича, у яқин кунларда Россия Президенти Владимир Путин билан Будапештда учрашмоқчи. Трамп Европага ёрдам бериш, кўплаб одамлар ҳаётини сақлаб қолишга ҳаракат қилаётганини ҳам қўшимча қилган.
Яъни, Россия – Украина уруши глобал можарога айланишининг олди олинишини таъкидлаган. Унинг фикрича, мазкур кенг кўламли уруш бошланишига собиқ президент Жо Байден томонидан юритилган нотўғри сиёсат сабаб бўлган.
– Украина Путиннинг эътиборида эди, агар мен раҳбар бўлганимда, Путин ҳеч қачон бундай йўл тутмаган бўларди, – деган Трамп. – Бу воқеа АҚШ томонидан баъзиўта муваффақиятсиз қарорлар қабул қилингани туфайли содир бўлди. Мен лавозимни қабул қилганимда бу масала билан боғлиқ ҳамма иш “палапартиш” ҳолатда эди. Урушни тўхтатиш ҳаракатини ўзимиз учун қилмаяпмиз. Бизни Европа билан океан ажратиб туради. Бу ишни Европага ёрдам бериш учунгина қиляпмиз. Улар уруш тугашини хоҳлайди, лекин ўзлари тўхтата олмаяпти. Ўйлайманки, биз муваффақиятга эришамиз ва бу билан кўплаб инсонлар ҳаётини сақлаб қоламиз.
Матбуот анжуманида Трамп Путин билан Будапештдаги учрашуви “эҳтимол, икки ҳафта ичида” бўлиб ўтишини маълум қилди. Унинг айтишича, аввал давлат котиби Марко Рубио РФ ташқи ишлар вазири Сергей Лавров билан учрашади. Музокарада вице-президент Жей Ди Вэнс ва махсус вакил Стив Уиткофф ҳам иштирок этади.
Трамп Путин ва Зеленский ўртасидаги муносабат ёмонлиги улар ўртасида учрашув ташкил қилишга тўсқинлик қилаётганини билдирди. Шунингдек, Россия етакчиси билан АҚШ томонидан “Томвагавк” узоқ масофали ракеталари етказиб берилиши масаласи муҳокама қилингани, мазкур таклиф Путинни “жуда норози” қилганини таъкидлади.
Бугун эса Трамп АҚШга ташриф буюрган Украина Президенти Владимир Зеленский билан учрашув ўтказиши кутиляпти. Мулоқот чоғида, жумладан, Украинага АҚШ ракеталари юборилиши мавзуси муҳокама қилинади. Бу ҳақда Трамп бир неча кун олдин ҳам гапирган эди. Зеленский таъкидлашича, агар Украина ушбу ракеталарни қўлга киритса, ушбу қурол фақат ҳарбий объектларга қарши қўлланади. Кеча Трамп Путин билан икки соат телефон орқали гаплашган. Суҳбатдан сўнг улар Будапештда учрашишга келишиб олган. Трамп суҳбат самарали кечганига урғу берди.
Украина раҳбари эса ижтимоий тармоқ саҳифасида “Москва “Томагавк”лар ҳақида эшитгандан кейингина мулоқотни тиклашга ошиқяпти” – деб ёзди.
<iframe width="640" height="420" src="https://www.youtube.com/embed/es2Uv_uqbQI" title="Tramp yana Putin bilan uchrashmoqchi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Анвархўжа Аҳмедов (видео), ЎзА