Трамп кўплаб давлат етакчиларига оширилган тариф 1 августдан кучга кириши ҳақида мактублар жўнатди, деб хабар берди “Евроньюс”.

АҚШ Президенти Япония ва Жанубий Кореядан импорт қилинадиган товарларга 25 фоизлик солиқ солинишини эълон қилди. Шунингдек, бошқа давлатлар учун бу қонун 1 августдан кучга киришини билдириб қонуннинг янги ставкаларини ҳам маълум қилган. Трамп номалар орқали импорт солиғини кўтариб ўч олинмаслигидан огоҳлантирган. Акс ҳолда Трамп маъмурияти тариф янада оширилишини айтган.

Америка етакчисининг савдо сиёсати иқтисодий ўсишни секинлаштириши, ҳатто АҚШ ва бошқа мамлакатларни турғунликка олиб келиши мумкинлиги ҳақидаги хавотирларни кучайтирмоқда. Трамп фикрича, маҳаллий ишлаб чиқаришни кучайтириш ва тадбиркорларга солиқ имтиёзи бериш учун шундай сиёсатини олиб бориш керак. Бундай кескин қарорлардан кейин турли хавотирлар кучайган бўлса-да, Президент музокара олиб боришга тайёрлигини ҳам билдирган. Кўпчилик бу ҳолатни Трампнинг иккиланаётгани ёки ўзи бошлаган иш натижасига кўзи етмаётганига йўйиб, баттар хавотирга тушмоқда.

Жанубий Корея Савдо вазирлиги 25 фоизлик тариф кучга киргунга қадар ўзаро манфаатли келишувга эришиш учун Қўшма Штатлар билан музокарани тезлаштирмоқчи.

Оқ уй матбуот котиби Кэролин Ливитт айтишича, Трамп тарифларни ўзи белгилаб, “дунёдаги ҳар бир мамлакат учун мослаштирилган савдо режаси” тузган. Аниқ шаклланган схемадан сўнг ҳужжатни уларга почта орқали жўнатишни режалаштирмоқда. Бу эса савдо битими бўйича музокара олиб боришнинг Трампча янги йўналиши экан.

Шу билан бирга мактублар келишилган қарорлар эмас, балки Трампнинг тарифлар бўйича ўз танловини ифодалайди, дейди Оқ уй матбуот котиби. Буни хорижий делегациялар билан ёпиқ эшиклар ортидаги музокаралар ҳар икки томон учун қониқарли натижа бермаганидан далолат, деб тушуниш мумкин.

Осиё жамияти сиёсати институти вице-президенти Венди Катлер Япония ва Жанубий Кореяга тариф оширилишини “афсусланарли” дея баҳолаган.

– Бу икки давлат иқтисодий хавфсизлик бўйича яқин ҳамкор сифатида Қўшма Штатларга кемасозлик, ярим ўтказгичлар, муҳим минераллар ва энергетика каби устувор йўналишлар бўйича кўп нарса таклиф қила олади, – деган Катлер.

Трамп бошқа ҳамкорлар қатори Европа Иттифоқи ва Ҳиндистон билан ҳамон ҳал қилинмаган савдо келишмовчилигига эга. Шу боис АҚШга экспорт учун 55 фоиз солиқ соладиган Хитой билан қатъийроқ музокара олиб бориш лозимлиги айтилади.

Жанубий Африка Президенти Сирил Рамафоса идораси баёнотида Трамп томонидан эълон қилинган тарифлар нотўғри тавсифлангани маълум қилинди. Унинг сўзларига кўра, мамлакати мураккаб вазиятга қарамасдан “АҚШ билан янада мувозанатли ва ўзаро манфаатли савдо алоқаси ўрнатиш учун дипломатик саъй-ҳаракатни давом эттиради”.

Трамп маъмурияти аввалроқ 90 кун ичида 90 та битим тузишга ваъда берган эди, бироқ ҳозиргача олиб борилган музокаралар натижасида фақат иккита савдо келишувига эришилган, холос. Шундай бўлса-да, Трамп ўйлаган режасини амалга ошириш ниятидан қайтгани йўқ. Мактублар ҳам айни жараённинг мантиқий давоми, дейиш мумкин.

<iframe width="560" height="315" src="https://www.youtube.com/embed/k-dZAoBk8HY?si=r7f8HXWSo1r5fop9" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

К.Бекжонов, ЎзА