АҚШ Президенти Дональд Трампнинг жамоатчилик орасидаги обрўси борган сари тушиб кетмоқда. Куни кеча “Reuters” агентлиги “Ipsos” компанияси билан бирга ўтказган тадқиқот натижаси янги раҳбарнинг рейтинги энг паст даражага тушганини кўрсатди.
– Олти кун давом этган сўровда респондентларнинг 42 фоизи Трампнинг президентлик фаолиятини маъқуллаган, – дейилади материалда. Ҳолбуки, январь ойида, яъни инаугурациядан кейинги сўровда Оқ уй раҳбарини 47 фоиз иштирокчи қўллаб-қувватлаган.
Тадқиқотга кўра, овоз берувчиларнинг қарийб 59 фоизи, жумладан республикачиларнинг учдан бири Америка жаҳон саҳнасида мавқеини йўқотаётганига эътибор қилган. Бунга етакчининг тажовузкор сиёсати, ўз ҳокимиятини кенгайтиришга қаратилган ҳаракатидан америкаликлар хавотирга тушаётгани сабаб бўлиши мумкин, дея изоҳ берган агентлик.
Биринчи президентлиги даврида Трамп сиёсатини, “Gallup” компанияси ўтказган сўровга кўра, 41 фоиз америкалик маъқуллаган. Бу Иккинчи жаҳон урушидан кейинги давр раҳбарлари кўрсаткичидан 19 фоиз кам. АҚШ Президентларини 1952-2020 йиллар оралиғида биринчи чоракда ўртача маъқулланиш рейтинги 60 фоизни ташкил этган.
4306 нафар ёши улуғ фуқаро қатнашган сўров иштирокчиларининг тўртдан уч қисми Трамп учинчи муддатга сайланмаслиги керак, деб ҳисоблайди, 59 фоизи Қўшма Штатлар жаҳон саҳнасида ўз ишончини йўқотаётганини таъкидлаган. Тадқиқотнинг баҳоланган хатолик чегараси 2 фоиз.
Дарвоқе, мазкур сўровни “Reuters” ўтказишига Оқ уй маъмурияти салбий муносабат билдириб келади. Масалан, аввалроқ агентлик тадбиркор, Ҳукумат самарадорлиги департаменти (DOGE) раҳбари Илон Маск оммани чалғитиш учун давлатдан миллионлаб доллар олганини маълум қилганди. Трамп ўз навбатида ижтимоий тармоқдаги саҳифаси орқали агентликдан Америка ҳукумати, хусусан Мудофаа вазирлигидан олган пулларини қайтаришни талаб қилган.
Трамп аввалроқ конституцияда чеклов мавжуд бўлса-да, учинчи муддатга қайта сайланиш имконияти мавжудлигини айтган. Қомусда бир шахс кетма-кет икки муддатдан ортиқ олий лавозимни эгаллаши тақиқланган, бироқ матн тўлиқ изоҳланмаган. Трамп иккинчи муддатга сайланган иккинчи президент. Гровер Кливленд (АҚШнинг 22 ва 24-президенти) даврида Конституцияда 22-тузатилган банд йўқ эди. Муддатлар сони бўйича чеклов қонун билан мустаҳкамланмаган, аммо сўзсиз келишув бор эди. 1951 йил Франклин Рузвельт ўзининг тўртинчи муддати бошида вафот этгандан кейингина конституцияга шундай ўзгариш киритилган.
С.Раҳимов, ЎзА