Пойтахтимизда жойлашган "Saxovat Sport Servis" мажмуасида ўтаётган W15 таснифига кирувчи халқаро теннис турнирида бугун яккаликлар ўртасида иккинчи давра, жуфтлик баҳсларида эса чорак финал босқичи баҳслари ташкил этилади.

Турнирнинг яккалик баҳсларида ҳамюртларимизнинг уч нафари иккинчи давра иштирокчисига айланди. Чорак финал остонасида ўтадиган баҳсларда Нигина Абдураимова ҳиндистонлик Вайшнави Адкар, Дарья Шубина нейтрал теннисчи  Дарья Хомуцианская, Диана Яковлева эса бошқа бир нейтрал мақомдаги Ксения Ласкутова билан рақобатлашадиган бўлди.

Шунингдек, жуфтлик йўналишида ҳамюртимиз Дарья Шубина ҳамда нейтрал мақомдаги теннисчи Варвара Паншина тандеми чорак финалда Жанубий Корея вакиллари Бо Юнг Жеонг ва Южин Ан билан куч синашса, умидли спортчиларимиз Насиба Эсполова ҳамда Диана Яковлева дуэти ярим финал йўлланмаси учун нейтрал теннисчилар Ксения Ласкутова ва Устиния Лекомцева жуфтлигига қарши кортга чиқади.

Жавоҳир Тошхўжаев,

ЎзА