Таҳлилларга кўра, ҳозир Тошкент вилоятида 28 минг 701 қути ипак қурти парваришланмоқда. Ундан 1 минг 636 тонна тирик ҳом ашё олиш режалаштирилган.

Мавсум давомида 7 мингта доимий, 75 мингта мавсумий иш ўрни яратилади. Жойларда 3 минг 669 гектар тутзор мавжуд. Жорий йилда яна 142 гектар ерда янги тут плантациялари ташкил этилди. Айни пайтда вилоят бўйича 11та пиллачиликка ихтисослашган туманларда 7 та тармоқ кластери фаолият юритмоқда. Бу ишларга 136 нафар аграном жалб этилган. Жорий йилда вилоятда 28 минг 701 қути ипак қурти парваришланади. Ундан 1 минг 636 тонна ҳом ашё олиш кутилмоқда. 

– Ипак қуртларининг 16 минг қутидан зиёди хорижий навдир, – дейди Тошкент вилояти Агропилла МЧЖ раҳбари Акмал Бойқобулов. – Пилла ҳомашёси 23 кунда тайёр бўлади. Вилоят миқёсида энг кўп ипак қурти Бекобод туманида 3,5 минг қутида парваришланмоқда. Ундан 200 тонна ҳом ашё олиш кутиляпти.

Пискент туманида 2 минг 570  қути ипак қурти боқиляпти. Туман бош аграноми Санобар Жўраеванинг таъкидлашича, намгарчилик юқори бўлгани боис тут барглари тўлиқ озиқланган. Ипак қуртларининг озуқасида ҳеч қандай муаммо бўлмайди. 464 та доимий, 6 минг 130 та мавсумий иш ўрни яратилган. Режа бўйича ҳудуд пиллакорлари 146 тонна пилла ҳосили олиши кутиляпти.Бундан ташқари, "Янгийўл туман Агропилла" МЧЖ томонидан айни кунларда 2 минг қути пилла аҳолига тарқатиляпти. Мазкур туманда ўтган йили 1 минг 900 қути ипак қуртидан 106 тонна пилла олинган бўлса, бу йил 114 тонна пилла олиш режалаштирилган. 

А.Мусаев, ЎзА.