Тошкент вилояти божхона бошқармаси “Яллама” чегара божхона пости орқали юк автотранспорт воситасида юртимизда фаолият олиб бораётган масъулияти чекланган жамиятлардан бирининг номига олиб келинаётган юклар терминал ҳудудида божхона кўригидан ўтказилди.
Ташкилотнинг ишончли вакили ҳамда холислар иштирокида ўтказилган божхона кўриги давомида, юк кузатув ҳужжатларида кўрсатилмаган, дастлабки ҳисобларга кўра қиймати 366 миллион сўмлик 3 турдаги 408 ўрамда матолар борлиги аниқланди. Ҳозирда юқоридаги ҳолат юзасидан божхона органлари томонидан суриштирув ҳаракатлари олиб борилмоқда.
***
Тошкент вилоятида саноат корхоналари билан ишлашнинг мониторинг тизими жорий қилинди. Бу ҳақда вилоят ҳокимининг тегишли ҳужжати имзоланди. Хусусан, ишлаб чиқариши камайган, фаолиятини тўхтатган, паст қувватда ишлаётган, кредит олиб ишга тушган, бироқ бугунги кунда 50 фоиздан паст қувватда ишлаётган ҳамда “нол” ҳажм кўрсатган корхоналар назоратга олинади. Аниқланган муаммолар таҳлил қилиниб, тегишли ташкилотлар орқали ечимини таъминлаш бўйича чоралар кўрилади. Айтиш мумкин, бу тизим тадбиркорлик субъектларининг молиявий аҳволини яхшилашга кўмаклашади.
***
Эрта баҳордан Шоличилик илмий-тадқиқот институти тажриба даласига экилган шоли кўчатлари ўз ҳосилини бермоқда. Институтда шолидан йилига 2 марта ҳосил олиш бўйича ўтказилаётган илмий тажриба шоликор фермерларда катта қизиқиш уйғотган эди. Тажриба майдонида шоли махсус ўрув машинаси ёрдамида ўрилди. Шу куннинг ўзида 2-ҳосил учун тайёрланган 20 кунлик эртапишар шоли кўчатлари экилди ва бу октябрь ойининг охирида ҳосил беради. Йил якунида эса умумий олинган ҳосил 110-120 центнерга етиши кутилмоқда. Ушбу технология асосида 40 фоизгача сув, 70 фоизгача уруғлик тежашга эришилди.
Институтда илмий асосланган навларнинг пишиш муддати 140 кундан 120 кунгача қисқартирилиб, ҳосилдорлик 76,2 – 82,4 центнергача оширилди. Вилоят бўйича жорий йилда шоли уруғлари 10 минг гектарга яқин ер майдонларига экилган. Бекобод, Қуйи Чирчиқ, Ўрта Чирчиқ ва Бўка туманларида бошқа ҳудудларга нисбатан юқори ҳосил олиш кутилмоқда.
А.Мусаев,ЎзА.