Ангор туманида Давлат Хўжаёров, деган биродаримиз яшайди. Полвонсифат бу кишини Сурхондарёдан ташқарида ҳам кўпчилик яхши танийди. Айни пайтда тумандаги Юқори Таллимарон маҳалласи раиси. Киришимли, кўнгли очиқ, дилкаш инсон.

Суҳбатлашсангиз баҳри-дилингизни очади. Юртнинг кураги ерга тегмаган полвонларию, истеъдодли ижодкорларининг, заҳматкаш деҳқонларининг ютуғидан фахр ҳиссини туйиб яшаши раис бобонинг қизиқарли гурунгларида ҳам сезилиб туради.

Адашмасам ўтган йил ёз фасли эди. Термиз шаҳрида учрашиб, бирпас турли мавзуларда суҳбатлашдик. Гап айланиб, одамларнинг турмуш тарзи ўзгараётганию, қишлоқларда деҳқончиликнинг яхши даромад манбаи бўлиб қолаётганига бориб тақалди.  

– Маҳалламизда беш юз саксондан ортиқ хонадон бор, – деди Давлат Хўжаёров. – Уларнинг аксарияти томорқасидан йилига икки-уч марта ҳосил етиштиришнинг ҳадисини олган. Помидор, бодринг, карам каби қишлоқ хўжалиги маҳсулотларини парваришлаб, мўл ҳосил олмоқда. Маҳалламизга келсангиз биргина карамнинг ўндан ортиқ турини учратасиз. Ишонаверинг, ўзи Ангорда озиқ-овқат экинлари парваришлашда биздан ўтадигани йўқ, десам муболаға бўлмайди.  

– Илғор, Баҳор маҳаллаларидан ҳам ўзиб кетдиларингизми-ей?  

– Ҳа, энди шундай деса ҳам бўлади. Томорқангизда иссиқхона бўлса, меҳнатидан эринмасангиз кони фойда экан. Бизнинг халқимиз меҳнатдан қочмайди. Ер билан тиллашиб ишлайди. Қўша машина, янги уй-жой, тўкин тўйлар томорқадаги йил бўйи қилинган меҳнатнинг меваси.  

– Хомкон маҳалласида ҳам иссиқхона қуриб, томорқадан қишин-ёзин унумли фойдаланишга қизиқиш ошаётгани кузатилмоқда, шекилли?  

– Бу маҳалладаям иссиқхоналар бор. Бироқ, биздагидек кўп эмас.  

Гурунгимиз энди қизиётганида раис бобонинг қўл телефони жиринглаб қолди. Маҳалладан кимдир чиқиб, муаммосини айтди, шекилли, анча суҳбатлашди. Кейин узр сўраб, биз билан хайрлашди.  

Давлат Хўжаёров маҳалласи мисолида одамларнинг тинч, тўкин яшаётганини айтиб берганида чуқур маъно бор. Зеро, Ангор туманида йилнинг тўрт фаслида ҳам озиқ-овқат экинлари етиштирилиб, ундан салмоқли даромад олаётган хонадонлар сафи йил сайин кенгайиб бормоқда. Ҳудудларда пишиб-етилаётган эртаги маҳсулотларнинг маҳаллий бозордан ортган қисми хорижга экспорт қилинаётир. Томорқалардан Япониянинг дайконларию, ўзимизнинг хуштаъм помидор, бодринг, карам, турли кўкатлар ва хорижнинг руколасигача топишингиз мумкин.  

Мамлакатимизда томорқадан оқилона фойдаланишга қаратилаётган эътибор тумандаги Хомкон маҳалласида ҳам ҳар қарич ер Юқори Таллимаронникидан кам ҳосил бермаслигини амалда кўрсатмоқда. Иссиқхона барпо этиб, қишин-ёзин деҳқончилик билан шуғулланаётган хонадонлар қўшниларига қараганда тўкинроқ турмуш кечирмоқда. Масалан, шу маҳаллада яшайдиган Камол Норматов томорқасининг 10 сотихида иссиқхона ташкил этган. Ўтган йил эртаги помидор парваришлаб, мўл ҳосил олди. Йил давомида 150 миллион сўм атрофида даромад топди.  

– Ҳоким ёрдамчисининг тавсияси билан кредит олиб, шу иссиқхонани қурдик, – дейди Камол Норматов. – Томчилатиб суғоришни йўлга қўйдик. Помидор кўчатларига оила аъзоларимиз билан меҳр бериб, ишладик. Яхши даромадга эга бўлдик. Ҳозир яна тўрт минг туп помидор кўчатини парваришлаяпмиз. Бу йил эртаги маҳсулотимиз ўтган йилгидан ҳам кўпроқ ҳосил беришини чўтлаяпмиз. Ҳалол меҳнатимиз ортидан кам бўлмаяпмиз.  

Маҳаллада юзга яқин оила ўз томорқасида иссиқхона барпо этган. Ўтган йили уларнинг сафига қўшилган Гулшодат Улуғбердиева ҳам кафтдек ерда меҳнат қилиб, салмоқли даромад топишни исботлади.  

– Экинларни парваришлашда турмуш ўртоғим ҳам яқиндан ёрдам бераётир, – дейди Гулшодат Улуғбердиева. – 15 сотих томорқамизнинг 8 сотихига иссиқхона қурганмиз. Бу йил рукола эккан эдик. Ҳозир унинг бир килосини 75 минг сўмгача сотяпмиз. Иссиқхоначилик биз учун янги касб. Шунингдек, чорвачилик, паррандачилик ва асаларичилик билан ҳам шуғулланиб, даромад топамиз. Ана шу меҳнатимиз эвазига оиламиз фаровон, рўзғоримиз бут. Юртимиз тинч, бозорларимиз тўкин. Ахир, ҳозирги замонда оила учун бундан бошқа бахт бўлмаса керак.  

Сурхон воҳаси қишлоқларини кезсангиз, томорқада ҳалол меҳнат қилиб, обод ва фаровон турмуш кечираётган оилаларнинг осойишта Ватан, мўътадил об-ҳаво ва унумдор тупроққа, ризқ-насибаси бутлигига шукрона айтиб, тўкин яшаётганидан баҳри-дилингиз очилади. Қишин-ёзин бозорларимиз расталарини безаб турадиган турли табиий озиқ-овқат маҳсулотларининг дастурхонларимиз ободлигини таъминлаётганидан фахр ҳиссини туясиз.  

Аслида ҳам бугунги глобаллашув ва сайёрамизнинг турли ҳудудларида юз бераётган қуролли можаролар, қарама-қаршиликлар даврида инсон учун файзли дастурхон атрофида хотиржам суҳбат қуришдан, эзгу орзу-ниятлар, улуғвор режалар оғушида яшашдан ортиқ бахт борми?  

Холмўмин Маматрайимов, ЎзА мухбири