25-октябрь – ички ишлар органлари ходимлари куни.

Лочин каби осмонларда баланд учган,

Ватанимга қасам дея, онт ҳам ичган.

Она замин тупроғини севиб қучган – 

Ватанимнинг марду майдон посбонлари!

Бугунги тинч-тотув ва шоду хуррам ҳаёт кечиришимиз, аввало, кун сайин халқимизнинг ҳурмат-эътиборини қозониб бораётган ички ишлар органлари ходимларининг беминнат хизматларига боғлиқдир. 

Тинчлик – бу нурафшон тараққиёт сари ташланаётган қадамларнинг залворли аммо унсиз товушига ўхшайди. Тинчлик – бу Она Ватанимизни, оиламизни, ҳаётимизни нурга тўлдириб, эзгу ниятларимиз рўёбга чиқишининг муҳим кафолатидир. 

Бундай улкан бахт-саодат давомли бўлиши учун ҳар доим дилимизда, тилимизда  шукрона бор, бўлиши лозим. 

Ўз ҳузур-ҳаловатидан кечиб умрини сиз ва биз, яъни фуқаролар осойишталиги ва барқарорлиги, ҳуқуқ ва эркинликларини ҳимоя қилиш, қолаверса, қонун устуворлигини таъминлашдек машаққатли ва масъулиятли ишга бағишлаб келаётган ички ишлар органлари ходимлари хизматлари ҳар қандай таҳсинга лойиқдир. Бундай эътирофларни бугун аҳолининг турли қатламлари, ёшидан қатъи назар барча ватандошларимиздан эшитиш мумкин. 

Қачонки диллар, кўнгиллар хотиржам бўлса, уйда, маҳаллада муаммо бўлмаса, аҳиллик-иноқлик ҳукмрон бўлса, демак бутун юрт тинч, Ватан эркин нафас олаяпти. Кундан-кунга, янгиланиш, бунёдкорлик, яратувчанлик бор, у давом этаяпти. Кимдир далада меҳнат қилаяпти, кимлар замонавий саноат корхоналарида, ёшлар эса эмин-эркин ўқимоқда – илм олмоқда, хорижий тилларни ўрганмоқда.

Ислоҳотлар қачон амалга ошади? Табиийки, тинч шароитда, осуда юртда. Инвесторлар қайси юртларга ўз маблағини тикиб, шу юрт ҳам, ўзим ҳам фойда кўрсам дейди? Албатта, қонунлар амал қиладиган, шарт-шароитлар муҳайё, қулай муҳит бор жойда.

Янги Ўзбекистон худди ана шундай имкониятлар эшиги очиқ мамлакатга айланиб бормоқда. Давлатимиз раҳбарининг Саудия Арабистонидан келган катта тадбиркорлар гуруҳи билан учрашуви, улар билан тузилган шартномалар, йирик-йирик лойиҳалар бўйича келишувлар бўлиб ўтганига ҳеч қанча вақт ўтгани йўқ, кеча Европа маркази Брюселда Ўзбекистон ва Европа Иттифоқи ўртасида ўзаро шериклик ва ҳамкорлик тўғрисидаги битимни имзоланиши, Юртбошимизнинг европалик молиячи, тадбиркорлар билан учрашуви, ҳамма-ҳаммасига Ўзбекистонимиздаги барқарор тинчлик мустаҳкамлиги замин яратмоқда. 

Биз мамлакатимиз эришаётган улкан ютуқларни кўриб, кўзимиз қувонганда, ана шундай муҳитни яратаётган, тинчлик учун, юртимизнинг ҳар бир гўшасида қонунлар амал қилишини таъминлаш йўлида кеча-кундуз толмай меҳнат қилаётган ватандошларимиз хизматини тўғри баҳолаймиз, қадрлаймиз ва уларга ташаккурлар айтамиз.

Мамлакатимиз хавфсизлиги ва миллий тотувлик, ҳамжиҳатликни таъминлаш қанчалик муҳим вазифа эканлигини барчамиз кўриб, англаб турибмиз. Бу йўлда Ички ишлар органлари ходимлари ҳар доим олдинги сафда эканлиги кўнгилларга ғурур бағишлайди.

Бугун Ўзбекистон инсон, унинг ҳаёти, қадр-қиммати, эркинлиги, шаъни, улуғланадиган юртга айланди. Ички ишлар органларининг тергов, жиноят қидирув, жамоат тартибини сақлаш, патрул-пост, кинология, йўл ҳаракати хавфсизлиги, пробация, миграция ва фуқароликни расмийлаштириш, транспортда хавфсизликни таъминлаш, эксперт-криминалистика, маънавий-маърифий ишлар ва кадрлар билан таъминлаш, молия, тиббиёт сингари қатор соҳавий хизматларида фаолият кўрсатаётган ходимлари, вазирлик тизимидаги ҳарбий хизматчилар Ватан ва унинг тинчлиги йўлида улкан бир кучга айлангани бор гап.  

Тан олиш керакки, бу ўз-ўзидан бўлиб қолаётгани йўқ. Тўғри танланган йўл, темирдек интизом, касбга садоқат соҳадаги хизмат сифатини янада оширмоқда. Таъбир жоиз бўлса, ички ишлар ходимларини халққа тобора яқинлаштирмоқда. Айнан, ана шундай якдиллик, яқинлик жамиятда том маънодаги тинчликка замин яратади. Узлуксиз хизмат, ҳар доим ҳам оила даврасида бўла олмаслик, фарзандлар тарбияси, яқинлар, сафдошлар, тенгдошлар, маҳалла-куй, дўстларнинг яхши-ёмон кунларида ёнида туриб, кўнглини олиш, буларнинг барига улгуриш, улгуролмаса ўрнини тўлдириш ички ишлар ходимидан катта куч талаб қилади.

Ана шундай оғир ва машаққатли соҳага муносиб бўлган, унинг иссиқ-совуғига чидайдиган, хизмат давомида учраши мумкин бўлган ҳар қандай фавқулодда вазиятларда ўз касби ва ҳарбий қасамёдига содиқ қола олиш масъулияти ва мураккаблиги Ички ишлар ходими ким, қандай кишилар бу соҳа ходими бўлиши мумкин, деган саволларга жавоб бўлади.

Менинг назаримда ички ишлар ходимлари – айнан шу соҳа учун туғилган одамлар. Ҳаётини шу йўлга бағишлаган, ўқув даргоҳида олган билим ва кўникмаларини кундалик ҳаёт билан уйғунлаштира оладиган, зийрак, жасур касб эгалари.

Ички ишлар идораларида ишлаб нафақага чиққан ва мен энди дам олишим керак деган кишини  мен билмайман. Нафақага чиққач ўз-ўзидан маҳалла-куйга аралашиб, беминнат хизматда юрганларини кўп кўраман. Шу маънода ички ишлар тизимида узоқ йиллар ҳалол хизмат қилиб, жамиятда ўз ўрнини топган, издошларига шахсий ибрат бўла олган, ватанпарвар, тоза табиатли, билимли, бой тажрибага эга бундай инсонларнинг ҳар бир босган изи ибрат, намуна деб ўйлайман. 

Ҳа, ички ишлар органлари ходимлари ўз хизмат фаолиятини доимо халқ ичида олиб боради. Уларнинг ютуғи ҳам, хато ва камчиликлари ҳам инсонлар кўз ўнгида бўлади. Бу орқали улар фуқаролар ҳимоячиси сифатида текширувчи ёки назоратчи эмас, балки барча ҳаётий масалаларда аҳолига кўмакчи, чинакам елкадош, ёнма-ён турадиган яқин инсонга айланиб улгурди. 

Бошига арзимаган иш тушса, не қиларини билмай жиноят кўчасида гангиб, ўзини йўқотиб қўяётганлар қанча?! Ўзининг қинғир мақсадига етишиш йўлида сохталикни касб қилганлар-чи? Нафс устун келиб – ҳалоллик, поклик, жўмардликни қурбон қилаётганлар, ниқоб сифатида фойдаланаётганлар ҳақида ҳам кўп эшитганмиз, эшитяпмиз. 

Бир сўз билан айтганда, бугун тартиб посбонлари ҳар қачонгидан-да ҳушёр тортиб, Ватан олдидаги бурчларини, халқ ишончини оқлаб келмоқда.

Уларнинг юрт учун, халқимиз тинчлиги учун қилаётган фидоийликларига тасанно, деймиз. Беминнат хизматлари олдида кекса ота-оналаримиз, халқимиз қўлларини доим дуога очадилар. Элнинг дуоси, худди мусаффо осмонимиз узра бахт қуши ўлароқ учиб юргандек... 

Машаққатли лек шарафли хизматингизда асло чарчаманг. Сизлар бор биз ҳар доим хотиржаммиз. Тилагим – азиз Ватанимиз тинч бўлсин! 

Мадина Зуфарова, ЎзА