Ўзбекистон Республикаси Олий таълим, фан ва инновациялар вазирлиги ҳамда Мактабгача ва мактаб таълими вазирлигининг Германия халқаро ҳамкорлик жамияти (GIZ) билан ҳамкорликдаги “Ўзбекистон касбий таълим тизимини ислоҳ қилиш ва модернизациялаш жараёнини қўллаб-қувватлаш” (TexVET Karyera) лойиҳаси натижаларига бағишланган конференция бўлиб ўтди.

Ёшларнинг замонавий касб танлашида янги босқични бошлаб берган мазкур лойиҳага 2023 йилнинг ноябрь ойида старт берилган эди. Ўтган вақт давомида мактаб ва техникумларда ўқитувчилар ва психологлар учун тренинглар ташкил этилди, интерактив қўлланмалар, рақамли курслар яратилди, иш берувчилар билан бирга менторлик дастурлари ишлаб чиқилди. Шунингдек, тайёрланган қўлланмалар Тошкент шаҳри, Фарғона, Самарқанд, Қашқадарё вилоятлари ва Қорақалпоғистон Республикаси бўйлаб мактаблар ва техникумларда тажриба-синовдан ўтказилди. Лойиҳа ўз атрофига 496 нафар мактаб ўқувчиси, 288 нафар техникум талабаси, 263 нафар ўқитувчи ҳамда 366 нафар жамоатчилик ва бизнес вакилини қамраб олди.

[gallery-23676]

Тадбирда таъкидланганидек, “TexVET Karyera” таълим соҳасида тизимли ёндашув ва касбий йўналтиришни шакллантириш, умумий ўрта мактаб ўқувчилари ва уларнинг ота-оналари учун касб танлаш имкониятларини ўрганиш ва келажак ҳаётга тайёргарлик кўриш учун янги йўлларни очиб беришга хизмат қилади. 

Конференцияда ҳамкор вазирликлар, Савдо-саноат палатаси, маҳаллий ҳокимият, халқаро донорлар, мактаблар ҳамда техникумлар вакиллари томонидан лойиҳа ютуқлари тақдим этилди. Ҳамкорлик натижалари асосида келгусидаги вазифалар муҳокама этилди.

Камола ЮСУПОВА, ЎзА