Тайёр маҳсулот ишлаб чиқарилмоқда
Мамлакатимизда жаҳон стандартларига тўла жавоб берадиган рақобатбардош маҳсулот ишлаб чиқаришни кенгайтириш, корхоналар моддий-техник базасини мустаҳкамлаш ва янада ривожлантиришга алоҳида эътибор қаратилмоқда.
Мамлакатимизда жаҳон стандартларига тўла жавоб берадиган рақобатбардош маҳсулот ишлаб чиқаришни кенгайтириш, корхоналар моддий-техник базасини мустаҳкамлаш ва янада ривожлантиришга алоҳида эътибор қаратилмоқда.Президентимиз Ислом Каримовнинг 2010 йил 15 декабрдаги “2011-2015 йилларда Ўзбекистон Республикаси саноатини ривожлантиришнинг устувор йўналишлари тўғрисида”ги қарори бу борада муҳим дастуруламал бўлаётир.
Етмишга яқин ишчи-хизматчи меҳнат қилаётган Қарши шаҳридаги “Radiant silk” Ўзбекистон – Хитой қўшма корхонасида ипакдан ип-калава ишлаб чиқарилмоқда.
– Жорий йилнинг ўтган олти ойида 447 миллион 387 минг сўмлик маҳсулот тайёрладик, – дейди корхона раҳбари Акмал Расулов. – Йилнинг иккинчи ярмида бу миқдорни сезиларли даражада ошириш учун астойдил ҳаракат қилмоқдамиз.
“Radiant silk”да техник ва технологик янгилаш жараёни давом этмоқда. 2015 йилга қадар бу ерда газлама ишлаб чиқариш ўзлаштирилиб, яна икки юзга яқин янги иш ўрни яратилади.
Бу каби саноат корхоналарининг ривожланиши, янгиларининг ташкил этилиши юртимизда етиштирилаётган пилла хомашёсини қайта ишлаш, ундан тайёр маҳсулот ишлаб чиқаришни кенгайтириш ҳамда экспорт ҳажмини ошириш билан бирга, иқтисодиётимизнинг барқарор ўсишини таъминлашга хизмат қилади.
Корхонада ишчи-хизматчиларнинг самарали меҳнат қилиши учун барча шароит ва қулайликлар яратилган. Хусусан, тиббий ёрдам кўрсатиш ва алоҳида дам олиш хоналари мавжуд. Ишчиларнинг ишга келиб-кетиши учун махсус транспорт ажратилган.
