30 июнь – Ёшлар куни муносабати билан мамлакатнинг барча ҳудудларида "Янги Ўзбекистон ёшлари бирлашайлик" шиори остида маънавий-маърифий тадбирлар ўтказилмоқда. Бир гуруҳ «Маърифат» тарғиботчилари, зиёлилар, олимлар ва санъаткорлар Фарғона вилоятига келдилар.

Тарғиботчиларнинг илк тадбири вилоят марказидаги Аҳмад  Фарғоний ҳайкали пойига гул қўйишдан бошланди. Шу ерда "Китоб карвони" лойиҳаси ўтказилди. Унда вилоят ҳокими ўринбосари Файзулло Қосимов, "Маърифат" тарғиботчилар жамияти аъзоси Раҳимбой Жуманиёзов Ўзбекистон ёшлар мамлакатига айлангани, давлат ёшларнинг камол топиб орзу – умидларига етиши, барча соҳаларда етук инсон, мутахассис бўлишлари учун  шароитлар яратаётганини таъкидладилар.

Шундан сўнг “Китоб карвони” вилоятнинг шаҳар ва туманлари ёшлари томон йўл олди.

– Бугундан бошлаб вилоятимиз бўйлаб маънавий тадбирлар, давра суҳбатлари, учрашувлар ҳамда гала-концертлар ўтказилади, ҳамда ижтимоий ҳимояга муҳтож ёшлар йўқланади, - дейди Республика маънавият ва маърифат маркази вилоят бўлими мутахассиси Дониёр Акбаров. – Бугун кечқурун эса Қўқон шаҳрида катта концерт ташкил этилади.

Тарғиботчилар Марғилонда илиқ кутиб олинди. Бу ерга шаҳар мактабларининг иқтидорли битирувчилари – ўқишни Олтин медаль билан тугатган ўқувчилар келишган. Тарғиботчилар гуруҳи аъзолари – таниқли санъаткорлар ёшларга Олтин медалларни топширишди.

Марғилон азалдан ипакчилар шаҳри. Бу соҳа пешқадамлари орасида ёшлар оз эмас. Шу ерда ёш дизайнерлар яратган ипак матоли кийимлар кўргазмаси бўлиб ўтди.

Ҳаёт синовларига дуч келганлар орасида ёшлар ҳам бор. Тарғибот гуруҳи аъзолари маҳаллаларда бўлиб аҳоли, асосан ёшлар билан учрашар экан, ногирон йигит-қизлар ва кам таъминланган оилалар ҳолидан хабар олдилар. Улар билан дилдан суҳбатлашиб, биргалашиб куйлаб қувнадилар. Албатта “Ёшлар куни” арафасида олиб келинган совғалар ҳам топширилди.

“Янги Ўзбекистон ёшлари бирлашайлик” шиори остидаги тадбирлар давом этмоқда.

<iframe width="560" height="315" src="https://www.youtube.com/embed/8fz6900S_no" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

 Муҳаммаджон Обидов,

 Элёр Олимов (видео), ЎзА