Республикада анъанавий тарзда Ўзбекистон Республикаси Ички ишлар вазирлиги томонидан ходимлар ўртасида турли йўналишда танловлар ўтказиб келинмоқда.

Президентимизнинг 2021 йил 26 мартдаги “Жамоат хавфсизлигини таъминлаш ва жиноятчиликка қарши курашиш соҳасида ички ишлар органлари фаолиятини сифат жиҳатидан янги босқичга кўтариш чора-тадбирлари тўғрисида”ги фармони ҳамда ички ишлар органлари ходимларини ҳар томонлама қўллаб-қувватлаш ва ҳамкасбларига намуна бўлаётган ходимларни муносиб рағбатлантириш мақсадида ИИВ томонидан “Энг яхшилар” республика кўрик танловлар ўтказилиши йўлга қўйилган.  

Жумладан, бугун мазкур танловнинг ҳудудий босқичида ҳам туман-шаҳар ИИБлардан қатнашган 50 нафарга яқин ходимлар ўртасида қизғин баҳслар бўлди. Якунда танловнинг ғолиблари аниқланди. “Энг яхши мураббий” танлови бўйича биринчи ўринни Қибрай тумани ИИБ профилактика катта инспектори капитан Темирлан Толебоев, иккинчи ўринни Янгийўл тумани ИИБ профилактика катта инспектори подполковник Дилшод Тешабоев эгаллади. Учинчи ўринни эса Бўстонлиқ тумани ИИБ катта терговчиси маёр Жавоҳир Расултоев эгаллади.  

Шунингдек, “Энг яхши китобхон” танлови бўйича биринчи ўринни Қибрай тумани ИИБ профилактика катта инспектори лейтенант Расулжон Маҳмудов, иккинчи ўринни Чиноз тумани ИИБ профилактика катта инспектори лейтенант Ихтиёр Деҳқонбоев эгаллади. Учинчи ўринга Бекобод тумани ИИБ профилактика инспектори капитан Абдухалил Одилжонов муносиб кўрилди.  

Мусобақа ғолибларига Бош бошқарма масъуллари томонидан диплом ва совғалар тантанали равишда топширилди.  

А.Мусаев,ЎзА.