Бугунги кунда мамлакатимизда тадбиркорлик фаолиятини ривожлантириш, тадбиркорлик қилиш истагидаги фуқароларни қўллаб-қувватлаш, уларнинг фаолиятини ҳуқуқий ҳимоя қилишга устувор аҳамият қаратилмоқда. Соҳага оид қатор ҳуқуқий ҳужжатлар қабул қилинган. Жумладан, бугунги кунда тадбиркорлик фаолияти билан боғлиқ 5000га яқин норматив-ҳуқуқий ҳужжатлар мавжуд бўлиб, уларнинг тарқоқ ҳолда ва ниҳоятда кўп миқдорда қабул қилингани зарур бўлган қонунчилик ҳужжатини топиш ҳамда амалда қўллашда қийинчиликларни юзага келтирмоқда.

Эндиликда Тадбиркорлик кодекси лойиҳаси ишлаб чиқилиб, 100дан ортиқ қонунчилик ҳужжатларини унификaция қилиш назарда тутиляпти. Тадбиркорлик соҳасидаги муносабатларни тартибга солишга қаратилган мазкур кодекс лойиҳасининг вазифаси жисмоний ва юридик шахсларнинг тадбиркорлик фаолиятида эркин иштирок этиши ва ундан манфаатдор бўлиши учун кафолатлар ҳамда шароитлар яратиш, хусусий мулкни, шунингдек, тадбиркорлик субъектларининг ҳуқуқлари ва қонуний манфаатларини ҳимоя қилишдан иборат.  

Кодекс лойиҳаси билан тадбиркорлик фаолиятининг қонунийлик, тадбиркорлик эркинлиги, субъектлар тенглиги, ҳалол рақобат, виждонлилик презумпцияси, коррупциядан холилик каби асосий принциплари мустаҳкамланмоқда. Амалда тоифа сифатида фақат кичик тадбиркорлик субъекти мавжуд бўлган бўлса, энди тадбиркорлик субъектлари кичик, ўрта ва йирик тоифаларга ажратилмоқда.  

Шунингдек, 39 та давлат органининг 147 та назорат функциялари ва Бизнес-омбудсманни хабардор этиш тартибида ўтказиладиган 20 турдаги текширувлар рўйхатлари мазкур кодексга илова сифатида тасдиқланиб, рўйхатга киритилмаган барча текширувлар Бизнес-омбудсман билан келишилган тартибда амалга оширилиши таклиф этилмоқда.  

Тадбиркорлик кодекси лойиҳаси айни пайтда парламент қуйи палатасида масъул қўмита томонидан дастлабки тарзда кўриб чиқилмоқда.  

 

М.Комилова,  

ЎзА