Фарғона вилояти Қувасой шаҳрининг Қирғизистонга чегарадош қисмида жойлашган Исфайрам-Шоҳимардон ирригация тизими бошқармасига қарашли “Полмон” сув тақсимлаш иншоотига бу йил сув бор ой кечикиб келди.

Бу гидроузел Фарғона вилоятининг 6 туманига сув етказиб беради. Боғдорчилик ва сабзавотчиликка ихтисослашган Қувасой шаҳри, Фарғона, Қува, Тошлоқ, Олтиариқ, Ёзёвон туманларининг 40 минг гектар экинзорлари ундан сув ичади. Шу кунларда гидроузелнинг йигирмадан зиёд ишчилари туманларга сув етказиб беришда жонбозлик кўрсатаётганини алоҳида таъкидлаш лозим.

– Сув танқислиги йил сайин ортиб бораётгани маълум, - дейди “Полмон” сув тақсимлаш иншооти бошлиғи Ҳокимжон Муродбеков. – 2022 йилнинг 14 май куни гидроузелга Қирғизистондан сувнинг келиши бирдан кўпайган эди. Бу йил эса 8 июнгача 1 кубометрга етиб-етмай келиб турган сув бирданига 7, кейинги кунлари 11-12 кубометрга кўпайганидан бошимиз осмонга етди. Энди чанқашга келиб қолган ғўза қатор ораларига тоғнинг тоза суви очилди. Шаҳар ва туманлар ирригация бўлимлари, махсус бўлимлар, фермер хўжаликлари сувчилари суғориш штабларига бирлашиб, ишга киришдилар.  

[gallery-12857]

Шу кунларда “Полмон”га борган кишининг кўнгли яйрайди. Гидроузелнинг кекса, тажрибали ходимларидан Муҳаммадали Арзиқуловнинг сўзига қараганда, “Полмон”дан сув оладиган тупроқ ўзанли канал ва сойларнинг бетонлаштирилиши айни заруратдир. Ана ўшанда сув исрофгарчилигининг олдини олиш эвазига ҳам жуда катта тежамкорликка эришса бўлади.

 

Муқимжон ҚОДИРОВ(сурат),ЎзА