Футбол бўйича Ўзбекистон Суперлигасининг 7-тур баҳслари старт олди. Тур доирасидаги учрашувлар 28 апрель кунигача давом этади.
Аввалроқ мазкур турни “Динамо” – “Нефтчи” жамоалари ўртасидаги беллашув очиб бериши керак эди. Бироқ, 23 апрелдан бошлаб май ойининг биринчи ўн кунлигигача Самарқанд шаҳрида олий даражадаги меҳмонлар ташрифи кутилгани сабабли мазкур учрашув кейинги муддатга қолдирилди.
Беллашув Лига тақвимидан захира куни сифатида белгиланган июль ойининг дастлабки кунларидан бирида ўтказилиши режалаштирилган. Унинг аниқ санаси 22 май куни бўлиб ўтадиган Ўзбекистон кубогининг 1/8 финал босқичига қуръа ташланганидан сўнг маълум қилинади. Шунингдек, Суперлиганинг 13–15-тур учрашувлари ҳам мазкур қуръа натижасидан келиб чиққан ҳолда белгиланади.
Шу сабабли 7-тур беллашувлари 26 апрель кунидан бошланади. Ушбу санада “Қўқон-1912” – “Хоразм”, “Машъал” – “Сурхон” ва “Сўғдиёна” – “Андижон” жамоалари ўртасидаги учрашувлар бўлиб ўтади.
27 апрель куни эса “Насаф” – “Қизилқум”, “Навбаҳор” – “Бухоро” ҳамда “Пахтакор” – “Шўртан” учрашувлари ўтказилади. Тур 28 апрель кунги “Бунёдкор” – ОКМК баҳси билан якунланади.
Бугунги баҳслар орасида "Сурхон" ва “Машъал” клуби ўртасидаги ўйин "Сурхон арена" стадионида бўлиб ўтади.
ЎзПФЛ маълумотига кўра, ушбу ўйин Термизда ташкил этилаётганига қарамасдан "Машъал" номинал мезбон, "Сурхон" эса меҳмон сифатида қайд этилди.
Клублар шу кунга қадар жами 14 та ўйинда ўзаро рақобатлашган. Унда "Машъал" 6 та ғалабани қўлга киритган бўлса, 4 та ўйинда дуранг қайд этган. Қолган 4 учрашув "Сурхон" фойдасига ҳал бўлган. Тўплар нисбати — 18/17 "Машъал" фойдасига. Бу йилги Суперлигада ҳар иккала клуб ҳисобида бир хил 6 очко бор. Бироқ голлар нисбатига кўра, “Сурхон” 11, “Машъал” эса 14-ўринда бормоқда.
Шунингдек, 7-турнинг илк баҳсларидан яна бири Жиззахдаги “Сўғдиёна” марказий стадионида “Сўғдиёна” ва “Андижон” клублари ўртасида ташкил этилади. Ушбу жамоаларнинг тўқнашувлари доимо мухлисларда катта қизиқиш уйғотади. Шу боис ҳам жамоаларнинг ўзаро учрашувларига оид айрим маълумотларни эътиборингизга ҳавола этамиз.
Миллий чемпионатлар доирасида бу жамоалар 48 марта рақобатлашган бўлиб, уларда “Сўғдиёна” 19 ўйинда, “Андижон” 17 учрашувда устун келган. Қолган 12 та учрашув дуранг билан якунланган.
Ҳозирда “Андижон” 9 очко билан Суперлигада 6-поғонада бораётган бўлса, “Сўғдиёна” 4 очко жамғариб, 15-ўриндан жой олган.
Маълумот учун: Олтинчи тур якунларига кўра, ОКМК жамоаси 16 очко тўплаган ҳолда Суперлига турнир жадвалида пешқадамликни сақлаб турибди. “Насаф” 14 очко билан иккинчи, “Бунёдкор” эса 12 очко билан учинчи ўринни эгаллаган.
Жавоҳир Тошхўжаев, ЎзА