Ўзбекистон Республикаси Президенти Шавкат Мирзиёевнинг таклифига биноан 29 октябрь куни юртимизга келган Словакия Республикаси Президенти Петер Пеллегринининг амалий ташрифи якунланди.

Самарқандда амалга оширилган ташриф дастурига мувофиқ 30 октябрь куни Ўзбекистон Республикаси Президенти Шавкат Мирзиёев ва Словакия Республикаси Президенти Петер Пеллегрини музокара ўтказдилар.  

Учрашувда Ўзбекистон билан Словакия ўртасидаги стратегик шериклик ва кўп қиррали ҳамкорлик муносабатларини янада кенгайтиришнинг долзарб жиҳатлари кўриб чиқилди.

Словакия етакчиси нуфузли меҳмонлар қаторида ЮНЕСКО Бош конференциясининг 43-сессияси очилиш маросимида иштирок этди. Шунингдек, ташкилот Бош конференцияси сессиясининг 31 октябрь кунги навбатдаги ялпи мажлисида қатнашиб, сўзга чиқди.

Петер Пеллегрини ташриф давомида Самарқанддаги тарихий-маданий ёдгорликлар билан танишди ҳамда Ўзбекистон ва Словакия ижодий жамоалари иштирокидаги концерт дастурини томоша қилди.

Олий мартабали меҳмонни Самарқанд халқаро аэропортида Ўзбекистон Республикаси Бош вазирининг биринчи ўринбосари А.Раматов ва бошқа расмийлар кузатиб қўйди.  

Ғ. Ҳасанов, А. Исроилов (сурат), ЎзА мухбирлари