Марокаш мезбонлигида ўтган футбол бўйича Африка Миллатлар кубоги ўз якунига етди. Мусобақанинг сўнгги ҳал қилувчи финал учрашувида Марокаш ҳамда Сенегал терма жамоалари ўзаро рақобатлашди.
Ушбу ўйинда қизиқарли ҳолат юз берди. Аниқроқ айтадиган бўлсак, учрашув ҳаками асосий вақтга қўшиб берилган 8-дақиқада Сенегал дарвозаси томон пенальти белгилади. Ушбу вазиятдан норози бўлган Сенагал терма жамоаси бош мураббийи Пап Тьяв жамоани ўйинни давом эттирмасликка чорлади ва майдондан олиб чиқиб кетди. Бироқ бир мунча вақт ўтгандан кейин Садио Мане футболчиларни қайта майдонга олиб келди.
Қарийб ўн дақиқадан кўпроқ тўхталиш бўлган учрашув яна бошланди ва мезбонлар вакили Браим Диас пенальтини голга айлантира олмади. Ушбу вазиятда Сенегал посбони Эдуард Менди аниқ ҳаракат қилди. Қўшимча бўлимларнинг 4-дақиқасида Папе Гейе томонидан киритилган гол баҳс якунига қадар ўзгармади ва Сенегал ўз тарихида иккинчи бор Африка Миллатлар кубоги чемпионига айланди.
Дарвоқе, Африка Миллатлар кубогининг 3-ўрин учун ўтган ўйинида Нигерия терма жамоаси Мисрни пенальтилар сериясида мағлубиятга учратди.
Жавоҳир Тошхўжаев,
ЎзА