Метро бекатлари жаҳон даражасидаги архитектура идоралари томонидан лойиҳалаштирилган. Бу ҳақда “Arab News” хабар бермоқда.

Декабрь ойи бошида Саудия Арабистони пойтахти Ар-Риёдда мамлакатда Маккадан кейинги иккинчи метрополитен тизими ишлай бошлади. Унда 85 та бекат мавжуд бўлиб, улардан 80 таси шу ойда ишга туширилади. 

Метро қурилиши 2014 йилда бошланган ва ҳозирда унинг қиймати 22,5 миллиард долларга баҳоланмоқда. Лойиҳа Яқин Шарқ анъаналарига кўра, жаҳон рекордларидан холи эмаслиги айтилмоқда. Тизимнинг узунлиги 176 км. У олти йўналишдан иборат. 

Вагонларнинг ранги линияларнинг рангига мос келади. Кўк ва қизил бирикмалар Германиянинг “Siemens” компанияси томонидан, тўқ сариқ рангли Канада-Германия “Bombardier” ва Франциянинг “Alstom” компаниялари томонидан етказиб берилди.

Йўловчилар хавфсизлигини таъминлаш мақсадида ҳар бир бекатда йўллар бўйлаб панжаралар ўрнатилган. Вагонлар уч тоифага бўлинади: оилавий, битта ва биринчи тоифали вагонлар. Оилалар, болали йўловчилар учун мўлжалланган ушбу вагонларнинг бир қисми аёллар учун ҳам ажратилган. 

Кўпгина платформаларда кўзи ожизлар учун тактил плиталар мавжуд. Баъзи маълумотлар ва огоҳлантириш белгилари Брайль алифбосида тақдим этилган. Ҳар бир бекатда ногиронлар учун аравачалар ҳам бор. 

Ар-Риёд метроси барқарор ривожланишга устувор аҳамият бериб, Саудия Арабистонининг 2030 йилгача ривожланиш дастурига мос келади. Ўлкада жамоат транспортини ривожлантириш орқали углерод чиқиндиларини сезиларли даражада камайтириш кутилмоқда. 

Муҳаррама Пирматова, ЎзА