Самарқанд вилояти мусиқали драма театрида мактаб ўқувчилари ўртасида “Турон мактаб театри” республика танловининг вилоят босқичи бўлиб ўтди.

Мактаб ўқувчилари ўртасида маданият ва санъатни ривожлантириш, иқтидорли болаларни аниқлаш ҳамда уларнинг театр санъатига бўлган қизиқишини қўллаб-қувватлаш мақсадида ўтган йили  “Турон мактаб театри” республика танлови телекўрсатув шаклда ташкил этилган эди.  

Ташкилотчиларнинг маълум қилишича, бу йил танлов низомига ўзгартириш ва қўшимчалар киритилди ва унда иштирок этиш учун 45 минг 288 жамоа онлайн рўйхатдан ўтди ва уларда 362 минг нафар ўқувчи қамраб олинган.

[gallery-22310]

Самарқанд вилояти бўйича 4394 нафар 6-10-синф ўқувчилари “Турон мактаб театри” республика танловида қатнашиш учун онлайн рўйхатдан ўтган. Шу йилнинг февраль ойида ўтказилган туман (шаҳар) босқичида вилоятдаги 1266 мактабдан 43940 нафар ўқувчи иштирок этди. Мазкур босқичда ғолибликни эгаллаган 128 нафар ўқувчидан иборат 16 жамоа вилоят босқичида иштирок етиш имкониятига эга бўлди.

Жамоалар икки шарт бўйича маданият ва санъатга оид билим ва маҳоратларини намойиш этдилар.

Ҳакамлар ҳайъати хулосасига кўра, Тойлоқ туманидаги 57-умумий ўрта таълим мактабининг “Баркамол авлод” жамоаси биринчи ўринни эгаллаб, танловнинг мамлакат босқичида қатнашиш ҳуқуқини қўлга киритди.  

Кейинги совринли ўринлар Самарқанд шаҳридаги 14-мактабнинг “Беҳбудий издошлари” ва Пайариқ туманидаги 6-мактабнинг “Турон” жамоасига насиб этди.  

Танловнинг якуний республика босқичи июнь ойида Самарқанд шаҳрида ўтказилиши режалаштирилган.

Ғ.Ҳасанов, А.Исроилов (сурат), ЎзА мухбирлари