Шу кунларда Самарқанд шаҳрида Мактабгача ва мактаб таълими вазирлиги томонидан “Турон” мактаб театри ҳамда “Иқтидор” мактаб ансамбли танловларининг мамлакат босқичи ўтказилмоқда.

Бугун вилоят мусиқали драма театрида “Турон” мактаб театри" танловининг бу йилги якуний босқичи бошланди.  

Мактаб ўқувчилари ўртасида маданият ва санъатни ривожлантириш, иқтидорли болаларни аниқлаш ҳамда уларнинг театр санъатига бўлган қизиқишини қўллаб-қувватлаш мақсадида ташкил этилган танловнинг қуйи босқичлари юртимизнинг барча ҳудудларида юқори савияда ўтказилди. Ғолиб бўлган 14 жамоа Самарқандда ўз маҳоратини кўрсатиб, ғолиблик учун саҳнага чиқмоқда.

Танловнинг республика босқичига чиққан 14 та жамоа таништирилгач, биринчи шарт – “Бизнинг мактаб” бўйича ўзлари таълим олаётган мактаб ҳақида маълумот беришни бошлади. “Театр – ибратхона” деб номланган иккинчи шартда жамоалар бирор саҳна асаридан парча намойиш этишлари лозим.

Жамоаларнинг чиқишларини мамлакатимиз театр санъатининг етук вакиллари, тажрибали актёрлар баҳолаб бормоқда.

– Саҳнада таниш-билиш кетмайди, – деди Ўзбекистон халқ артисти Зуҳра Ашурова. – Устозлар айтганидек, саҳна бу муқаддас даргоҳ. Унга хиёнат қилинмайди. Иштирокчиларнинг мактаб ўқувчилари эканини ҳисобга олган ҳолда иқтидорига қараб баҳолаймиз ва уларга омад тилаймиз.

[gallery-23944]

Тойлоқ туманидаги 57-умумий ўрта таълим мактабининг “Баркамол авлод” жамоаси Самарқанд вилояти мактаб жамоалари орасида биринчи ўринни эгаллаб, танловнинг мамлакат босқичига йўлланма олган.  

– Жамоамизда 11 нафар ўқувчи бор, – дейди жамоа устози, ўқитувчи Зарина Пармонова. – Танловга Усмон Азимнинг “Кундузсиз кечалар” асари асосида яратилган спектаклни тайёрлаб келганмиз.

Ғ.Ҳасанов, А.Исроилов (сурат), ЎзА мухбирлари