Европа Иттифоқи кенгаши жума куни Россияга қарши санкциянинг 18-тўпламини маъқуллади. Чеклов рўйхатига 14 жисмоний шахс ва 41 нафар юридик шахс киритилган.

— Қарор эълон қилинган кундан кучга киради, — дейилган ЕИ расмий журналида чоп этилган ҳужжатда.

"РИА Новости" ёзишича, юридик шахслар рўйхатида Ульянов дастгоҳсозлик, Алексий синов-механика, Рязань давлат жиҳозсозлик заводлари,

“Полимер” акциядорлик жамияти, “Инроел” МЧЖ, “Крафттек”, “Аэросcан” каби корхоналар бор. Шунингдек, БАА, Сингапур, Маврикий, Хитой, Ҳиндистон ва Озарбайжонда рўйхатдан ўтган жами 18 компания ҳам тақиққа учради.

Санкция РФнинг 22 банкига ҳам тааллуқли. Мамлакатнинг тўғридан-тўғри инвестиция жамғармаси ва шу фонднинг шўъба корхоналари билан амалиёт ҳам ман этилади.

Чеклов энергетика соҳасига ҳам йўналтирилган. Масалан, нефть нархи шифтини ўзгартирадиган автоматик механизм жорий этилади. Бу Россия нефти нархини бир баррель учун тахминан 47,6 долларгача пасайтириши кутиляпти.

РФ нефтини ташиётган хуфия танкерлар (“соя”даги кемалар) капитанлари, хусусий халқаро денгиз ташувчилари ҳам таъсирга учрамоқда.

Таъкидлаш жоиз, Иттифоқ аъзолари мазкур амалиёт бўйича узоқ вақт келиша олмади. Лойиҳага Словакия ва Венгрия қаршилик қилиб келди. Ушбу мамлакатлар Россия энергия ресурсларини импорт қилгани боис, тақиқнинг салбий оқибатидан хавотирга тушган.

Кремль матбуот котиби Дмитрий Песковнинг фикрича, Европа Россиядан арзон энергия олишдан бош тортишга қарор қилиб, “ўз оёғига болта урган”. РФнинг ЕИдаги доимий ваколатхонаси эса янги “мажбурий” санкция кўҳна қитъа иқтисодиётининг шусиз ҳам аянчли аҳволини янада ёмонлаштиришини таъкидлаган.

С.Раҳимов, ЎзА