Ўзбекистон Қуролли Кучлари ташкил этилганининг 33 йиллиги ҳамда Ватан ҳимоячилари куни муносабати билан Сенатнинг Мудофаа ва хавфсизлик масалалари қўмитаси томонидан тадбир ташкил этилди. Унда сенаторлар, ҳарбийлар, ички ишлар органлари ходимлари иштирок этди.
Қўмита раиси Қутбиддин Бурҳонов Ватанни ҳимоя қилиш, уни кўз қорачиғидек асраб-авайлаш ҳар бир фуқаронинг муқаддас бурчи ва вазифаси эканини таъкидлади.
Конституциянинг 64-моддасида Ўзбекистон Республикасини ҳимоя қилиш Ўзбекистон Республикаси ҳар бир фуқаросининг бурчи эканлиги мустаҳкамлаб қўйилган.
Буюк аждодларимиз юрт ҳимояси йўлида шаъни, ор номусини ўртага қўйиб, ёвга қарши курашган. Жумладан, Соҳибқирон Амир Темурнинг нақадар буюк ватанпарвар бўлгани тарихдан маълум.
Бобокалонимиз биронта жангда енгилмаган, Соҳибқироннинг байроғи ҳамиша баланд ҳилпираб турган. У бугунги авлодлар учун қатъият, ҳарбий маҳорат, ғурур ва ифтихор тимсолидир.
– Юртнинг кучи – бирликда, қадри эса тинчликдадир, – деди Қутбиддин Бурҳонов. – Ҳозирги таҳликали даврда давлатимизнинг мустақиллиги ва суверенитетини, халқимизнинг тинч ва эркин ҳаётини ҳимоя қилиш энг муҳим вазифадир. Шу боис, Қуролли Кучларимизнинг жанговар ва маънавий салоҳиятини оширишга эътибор янада кучайтирилмоқда. Ёшларни замонавий билим ва касб эгалари этиб тарбиялашга катта имкониятлар сафарбар этилаётир.
Жумладан, мамлакатимиз ёшларини ҳарбий-ватанпарварлик, миллий ва умуминсоний қадриятларга ҳурмат, юксак маънавий-ахлоқий фазилатлар руҳида тарбиялаш, уларнинг онгига тинчликни кўз қорачиғидек асраб-авайлаш зарурлигини чуқур сингдириш, билим ва кўникмаларини ошириш мақсадида 2024 йил 15 ноябрда Президентимизнинг “Ўқувчи-ёшларни чақирувга қадар бошланғич тайёрлаш тизимини янги босқичга олиб чиқиш чора-тадбирлари тўғрисида”ги қарори қабул қилинди.
Қарорга мувофиқ, энди чақириққача бошланғич тайёргарлик ўқитувчиси штати Мудофаа вазирлигига ўтказилди. Энди бу вазифага Қуролли Кучлар захирасидаги ҳарбийлар ишга қабул қилинади.
Мазкур фан бўйича янги ўқув дастури ва дарсликлар яратилмоқда. Ҳар бир туман ва шаҳарда биттадан мактаб негизида “Жасорат мактаби” фаолияти йўлга қўйилади.
Олий ўқув юртларида эса мазкур йўналишлар бўйича педагоглар тайёрлашнинг янги тизими яратилиб, малака талаблари ва таълим сифатини ошириш устувор вазифа этиб белгиланди.
Бу Ўзбекистон Қуролли Кучларининг янги, муносиб авлоди шаклланишига замин яратмоқда.
“Ўзбекистон – 2030” стратегиясида мамлакатимиз хавфсизлиги ва ҳудудий яхлитлигини, жамиятимизда тинчлик ва тотувликни таъминлаш, юртимиз мудофаа қобилиятини янада мустаҳкамлаш ва Қуролли Кучларимизни ривожлантириш масалалари устувор йўналишлар қаторида белгиланди.
Шу асосда мамлакатимизнинг ҳарбий-илмий ва ишлаб чиқариш салоҳиятини кучайтириш, Қуролли Кучларнинг жанговар шайлигини ошириш, уларни замонавий қурол-яроғ ва ҳарбий техника билан таъминлаш, қўшинлар фаолиятига рақамли технологияларни кенг жорий этишга янада улкан аҳамият қаратилмоқда.
Давлатимиз раҳбари, Қуролли Кучлар Олий Бош Қўмондони Шавкат Мирзиёев ташаббуси ва кўрсатмалари билан сўнгги йилларда мамлакатимизда олиб борилаётган кенг кўламли ислоҳотлар натижасида Миллий армиямизнинг қиёфаси ва салоҳияти тубдан ўзгарди. Бугунги кунда Ўзбекистон Қуролли Кучлари мамлакатимиз хавфсизлиги ва барқарорлигини, сарҳадларимиз дахлсизлигини таъминлашга қодир бўлган, ҳаракатчан ва пухта қуролланган қудратли кучга айланди. Қолаверса, Миллий армия чинакам жасорат ва матонат мактабига айланди.
Бу борада Сенатнинг Мудофаа ва хавфсизлик масалалари қўмитаси ҳам Мудофаа вазирлиги, Қуролли Кучларимизнинг барча тузилмалари билан амалдаги қонун ҳужжатларини такомиллаштириш, ёшларни ҳарбий-ватанпарварлик руҳида тарбиялаш борасида яқиндан ҳамкорлик қилиб келмоқда.
Қўмита мажлисларида Қуролли Кучлар қурилиши ва уни янада ривожлантиришнинг долзарб муаммолари доимий равишда муҳокама қилиниб, ушбу масалалар юзасидан аниқ таклифлар акс этган қўмитанинг тегишли қарорлари қабул қилинмоқда.
Тадбирда бу йўналишдаги ишлар кучайтирилиши, юртимиз ҳимоясини таъминлашда эътибор қаратилиши зарур бўлган жиҳатлар ҳақида фикр алмашилди.
Норгул Абдураимова, ЎзА