Фарғона вилояти қишлоқ хўжалиги маҳсулотлари экспорти бўйича мамлакатимизда биринчи ўринни эгаллаб турибди. Илгари унинг асосий қисмини пахта толаси ташкил этган бўлса, энди боғдорчилик маҳсулотлари экспорти драйверга айланди.

Вилоят экспортида қайта ишланган, қуритилган мевалар улуши тобора кўпайиб боряпти. Масалан, шу йилнинг ўтган саккиз ойида хорижга 2,6 млн долларлик қуритилган олхўри экспорт қилинди. Бундай экспортёрлар орасида Қува туманидаги “Yingtai  Agricultural Food Technology” корхонаси ҳам бор. Шу кунларда бу ерда олхўрини қайта ишлаш, қуритиш ишлари олиб борилмоқда.

– Биз ўзимизга қарашли 16 гектар боғларда олхўри етиштирамиз. Бундан ташқари қувалик боғбонлар билан шартнома асосида ишлаймиз ва уларга аввалдан бунак бериб етиштирган маҳсулотларини сотиб оламиз, – дейди хорижий корхона муассиси Хуан Чи Сунг.

Корхона 2020 йилда қурила бошлаган эди. Унга Хитойдан зарур технологиялар олиб келинди. 2000 тонна сиғимли музлатгичга эга. 30 та доимий, яна 50 та мавсумий иш ўрни яратилган.

– Ўтган йили қуритилган олхўрининг ўзидан 500 тонна экспорт қилишга эришган эдик.Бу йил 800 тоннага етади. Биз бундан ташқари ўрик ва узум қуритиш ҳамда экспорт қилиш билан ҳам шуғулланяпмиз, – дейди хитойлик тадбиркор.

Бу йил боғларга барака кирди. Шундай паллада мевани қуритиб, экспорт қилиш сердаромад соҳалардан бирига айланди.

<iframe width="560" height="315" src="https://www.youtube.com/embed/tgsBHZiARk8?si=YjW1b4kaJnc92lw6" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳаммаджон Обидов, Элёр Олимов(сурат,видео),

ЎзА мухбирлари