Юртимизда ёш олималарни қўллаб-қувватлашга доимо эътибор қаратиб келинган. Сабаби қайси соҳада бўлмасин илм қилиш игна билан қудуқ қазигандек мушкул иш. Хотин-қизларимизнинг матонати ва метин иродаси туфайли қишлоқ хўжалигида ҳам кўплаб кашфиётлар қилинмоқда.

Масалан, Шалола Ҳасанова Қишлоқ хўжалиги вазирлиги ҳузуридаги Ўсимликлар генетик ресурслари илмий-тадқиқот институтининг таянч докторанти бўлиб, қулупнай генетикаси ва селекцияси соҳасида илмий изланишлар олиб бормоқда. У ўз илмий фаолиятини Ўзбекистон Республикаси Фанлар академияси Генетика ва ўсимликлар экспериментал биологияси институтида, устози биология фанлари доктори Дилрабо Эрназарова илмий раҳбарлигида стажёр-тадқиқотчи сифатида бошлади.

Шалола Ҳасанова ўз тадқиқотларида қулупнайнинг қимматли хўжалик белгиларига эга янги навларини яратиш мақсадида молекуляр биологиянинг замонавий усулларидан – хусусан, “ДНК-маркер” технологияларидан самарали фойдаланиб, янгилик яратди. Ёш олиманинг изланишлари қулупнай навларининг ҳосилдорлиги, стресс омилларга чидамлилиги ва мева сифати каби муҳим хусусиятларини яхшилашга қаратилган бўлиб, миллий селекция дастурларида катта амалий аҳамиятга эга.

- Ҳозирги яратилаётган навлар ва олиб борилаётган илмий тадқиқотларимиз олдин ҳам ўрганилган.Ўзбекистон бўйича бир нечта навлар яратилган, - дейди Қишлоқ хўжалиги вазирлиги ҳузуридаги Ўсимликлар генетик ресурслари илмий-тадқиқот институтининг таянч докторанти Шалола Ҳасанова. – Лекин бизнинг илмий ишимизнинг афзаллиги шундаки биз молекуляр генетика орқали ушбу тадқиқотни олиб боряпмиз ва бу тадқиқот молекуляр генетика орқали бўлгани учун Ўзбекистонда илк бора амалга ошириляпти.

Ёш тадқиқотчи сифатида Шалола Ҳасанова ўз изланишлари орқали мамлакатимизда мевачилик соҳасида молекуляр селекцияни кенг жорий этишга ҳисса қўшиш ниятида. Унинг таянч докторантура доирасидаги тадқиқотлари илмий-назарий асосга эга бўлиб, амалий натижаларга йўналтирилганлиги билан аҳамиятлидир.  

<iframe width="560" height="315" src="https://www.youtube.com/embed/v7VOzVv-WCM?si=yolbTz-2gZ7tJqAF" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов, Аброр Содиқов, Улуғбек Тўхтаев, ЎзА