Бухоро вилояти божхона бошқармасининг Контрабандага қарши курашиш бўлими ходимлари ҳамда Ромитан тумани Иқтисодий жиноятларга қарши курашиш бўлими билан ҳамкорликда тезкор тадбир ўтказилди.

Тадбирда лицензиясиз заргарлик буюмларини савдога чиқариш  билан боғлиқ яна бир ҳолатга чек қўйилди. Унда  фуқаро М.С. шартли харидорга 2 миллион сўм эвазига қўлбола усулда тайёрланган битта тилла узукни сотаётган вақтида тадбир иштирокчилари томонидан қўлга олинди. 

Бундан ташқари мазкур шахсга тегишли бўлган заргарлик буюмлари сотиладиган савдо растаси кўздан кечирилганида, қўлбола усулда тайёрланган  яна 42 дона, оғирлиги  132 грамм бўлган тилла тақинчоқлар сотиш  мақсадида сақланаётганлиги аниқланди. 

Ҳозирда  ҳолат юзасидан божхона органлари томонидан тегишли ҳужжатлар расмийлаштирилди. Умумий қиймати 188 миллион сўм деб баҳоланаётган заргарлик буюмлари ҳуқуқий баҳо берилгунга қадар вақтинча сақловга олинган. 

Зариф Комилов, ЎзА мухбири.