Саудия Арабистон ва Аргентина жамоалари ўртасидаги матч (2:1) футбол тарихида ўчмас из қолдиради. Лионель Мессининг ўзи ва жамоаси кутилмаган натижадан ҳали-вери ўзларига келолмасалар керак. Ҳаяжон шу даражага етдики, бугун, ҳатто Саудия Подшоҳи фармони билан мамлакатда дам олиш куни эълон қилган.
Кечаги билан Саудия жаҳон чемпионатларидаги ғалабалари сонини тўрттага етказди. Унгача у “ЖЧ-2018”да Мисрни (2:1) ва “ЖЧ-1994”да Бельгия (1:0) и Марокашни (2:1) мағлуб этган эди.
Мундиалда йигирманчи маротаба майдонга тушган Месси Саудияга урган голи билан Португалия жамоаси ҳужумчиси Криштиану Роналдуга етиб олди. Ҳар икки моҳир тўпурар жаҳон чемпионатидаги голлари сонини еттитага етказишган. Фақат Роналду жаҳон чемпионатида ўн етти ўйин ўйнаб, бу маррага эришган.
Месси ва Роналду бешинчи марта бундай чемпионат баҳсларида қатнашмоқдалар.
Шунингдек, Олдржих Неедли (Чехия), Лайош Тихи (Венгрия), Карека (Бразилия), Анджей Шармах (Польша), Луис Суарес (Уругвай), Жонни Реп (Нидерландия) ва Ханс Шефер (Германия)лар жаҳон чемпионатларида еттидан гол урганлар.
Саудия ва Аргентина ўйини ҳақида яна бир факт: Лионель Скалони шогирдлари 36 ўйиндан бери мағлубият аламини тортмай келаётган эдилар. Жамоа бу борада Италияга етиб олишига бир баҳя қолганди. Италиялик футболчилар 2018 йилнинг сентябрь ойидан то 2021 йилнинг октябрь ойигача ўтказган 37 ўйинда бирор марта ҳам мағлуб бўлмаган эдилар.
Кеча Франция Австралия жамоасини 4:1 мағлуб этган матчда французларнинг бир голини Килиан Мбаппе урди. 23 ёшли ҳужумчининг голи жаҳон чемпионатларидаги Франция рекордини янгилади. 1958 йилда Жюст Фонтен 24 ёшида мундиалда урган беш голи билан мамлакат футболи тарихига кирган эди.
Кеча Роберт Левандовски Мексика дарвозасига 11 метрли жарима тўпини киритолмади. Бу эса Польшанинг жаҳон чемпионатларида учинчи марта бундай жарима тўпини амалга оширолмагани маълум бўлди. Леваедовскига қадар 1978 йилда Казимеж Дейна ва 2002 йилда Мацей Журавскиларнинг бу борада омадлари чопмаган эди.
22 ноябрь куни Мексика ва Польша, Дания ва Тунис ўйинларида дуранг натижа қайд этилди.
Қизиғи шундаки, аввалги Россияда ўтган жаҳон чемпионатидаги жами 64 ўйин давомида бор-йўғи бир мартагина – Дания ва Франция матчида дарвозалар ишғолсиз қолган эди.
Франциялик Килиан Мбаппе Автралияга қарши ўйинда рақиб жамоанинг жарима майдонида 19 марта ҳаракатланиб, янги рекорд ўрнатгани қайд этилди.
Бугунга қадар жаҳон чемпионатларида рақиб жарима майдонида 16 марта гол уриш, аниқ тўп етказиб беришга уринишлари қайд этилган эди. 2018 йилда бразилиялик Неймар Сербияга, испаниялик Давид Вилья Гондурасга ва сенегаллик аль-Хожи Диуф Швецияга қарши ўйинларда шундай амалларни бажаришга эришганлар.
Қатар ҳокимияти чемпионат бошланишига икки кун қолганда стадионларда пиво таъқиқи тўғрисидаги хабар анча баҳсларга сабаб бўлган эди. Ўшанда ФИФА “музокаралардан кейин томошабинлар, тарафдорлар учун спиртли ичимликлар рухсат берилган жойлардагина истеъмол қилиш мумкинлиги, пиво сотуви эса стадионларда мумкин эмаслиги”ни эълон қилганди.
Пивони мундиалнинг муҳим ҳомийларидан бири бўлган “Budweiser” брендига алоқадор халқаро “AB InBev” пиво корпорацияси ҳар матч бошланмасдан уч соат қолгунча ва ўйин тугагач бир соат кейин сотишга рухсат олган эди.
“Томошабинларнинг кўпчилигини Яқин Шарқ ва Жанубий Осиё мамлакатларидан бўлгани учун алкоголь муҳим нарса, деб топилмаган эди. Қолаверса кўплаб фанатлар учун бу кўнгилсиз воқеа бўлиши мумкинлиги эътиборга олинганди”, дейилади расмий хабарда.
Аслида Қатарнинг “ЖЧ-2022”ни ўтказиш ҳуқуқини олган заҳоти бу масала кўтарилганди. Айрим қўшни давлатларга нисбатан Қатарда алкоголь тўлиқ таъқиқланмаган. Аммо мамлакатга кириб келаётганлар ўзи билан спиртли ичимликни олиб киришлари мумкин эмас.
Аброр ХОН, ЎзА