Мамлакатимизда 9 май – Хотира ва қадрлаш куни кенг нишонланмоқда. Сана муносабати билан 1941-1945 йиллардаги Иккинчи жаҳон уруши қатнашчилари ва ногиронлари, уруш қатнашчиларига тенглаштирилган шахслар ҳамда уруш давридаги меҳнат фронти қатнашчиларининг хонадонларига борилиб, уларнинг ҳолидан хабар олинмоқда.

Навоий вилояти ҳокими Нормат Турсунов Қизилтепа туманида яшовчи Иккинчи жаҳон уруши қатнашчиси Рашида ая Ишқулова хонадонида бўлиб, Президент табриги, 10 минг АҚШ доллари миқдоридаги пул мукофоти ва эсдалик совғаларини топширди. 

Рашида Ишқулова Россия Федерацияси, Бошқирдистон АССР Стерлитамак шаҳарчасида туғилган. Москвада ҳарбий ҳамширалик курсида тайёргарликдан ўтиб, госпиталда иш бошлаган.

У Москва, Киев, Минск ва Варшава шаҳарларини душмандан озод қилишда иштирок этиб, Берлинда ғалабани кутиб олган.

1945 йилда урушдан қайтган онахоннинг ҳаёт йўли Ўзбекистон билан боғланган. 1946 йилда Бухорога келган қаҳрамонимиз вилоят касалхонасида ҳамшира бўлиб ишлаган. 1947 йилда эса Ғиждувон туманига кўчиб келади ва Шавкат ака Ишқулов билан турмуш қуриб, 4 нафар фарзандни вояга етказди. Кейинчалик Қизилтепа туман марказий шифохонасида ишлайди.

Учрашувда Рашида ая ҳаёт йўли, уруш даври хотираларини сўзлаб берди ва дуога қўл очиб, бугунги дориламон кунларга яна бир бор шукроналик келтирди. 

А.Бўриев, ЎзА мухбири