Украина пойтахти Киевда профессионал боксчиларнинг дунёдаги энг кучли ташкилотларидан бири бўлган Бутунжаҳон боксчилар уюшмаси (WBC)нинг ваколатхонаси очилди.

Унинг тантанали очилиш маросимида иштирок этган WBC президенти Маурисио Сулейман Украина профессионал бокс ривожланган давлатлардан бири ҳисобланишини таъкидлаб, келажакда бу ерда бир қатор чемпионлик жанглари ўтказилишини айтиб ўтди. WBC бўлинмасининг айнан Киевда ташкил этилишини минтақага яқин мамлакат боксчилари учун чемпионлик сари қулайликлар яратиш эканлиги билан изоҳлади.

Бундан кўринадики, энди Украинага яқин мамлакатлар боксчиларигина эмас, Ўзбекистон, Қозоғистон давлатларининг профессионал боксчиларига ҳам ўз салоҳиятини кўрсатиш географияси кенгаймоқда. Рио олимпиадаси ғолиби Хасанбой Дўсматовнинг айнан Украина бокс рингларида бир муддат жанг олиб борганлигини эсласак, демак, профессионал боксчиларимизнинг ҳаракат майдони кенгаймоқда.

Тўлқин РЎЗИЕВ, ЎзА