Президент Ташкент қаласындағы жаңарған махалла өмірімен танысты
Президент Шавкат Мирзиёев Ташкент қаласының «Мирза Ұлықбек» ауданы аумағындағы «Боғимайдон» махалласында жүзеге асырылған абаттандыру және құрылыс жұмыстарымен танысты.
Республика көлемінде махаллалардың инфрақұрылымын жетілдіру, оларға Жаңа Өзбекстан келбетін енгізу және халық үшін лайықты өмір сүру ортасын қалыптастыру басым міндеттердің бірі ретінде белгіленген.
Осы бағытта 2026 жылғы 16 ақпанда қабылданған «Махалланы дамыту және қоғамды өркендету жылы» мемлекеттік бағдарламасы махаллаларды заманауи негізде дамытуда, олардың әлеуметтік және экономикалық әлеуетін арттыруда маңызды бағдарға айналып отыр.
Ташкент қаласының «Мирза Ұлықбек» ауданы аумағындағы «Боғимайдон» махалласы бүгінде осындай жаңару нәтижесінде мүлде жаңа келбетке ие болған. 1987 жылы негізі қалаған бұл махаллада қазіргі таңда 41 көпқабатты тұрғын үй, 1 990 пәтер бар, мұнда шамамен 5,5 мың тұрғын өмір сүреді.
Аумақта тұрғындар үшін заманауи инфрақұрылым қалыптастырылған. Атап айтқанда, мұнда 20 балалар ойын алаңы, 11 воркаут алаңы, 3 шағын футбол алаңы және теннис корты салынған. 2 мектепке дейінгі білім беру ұйымы 500-ге жуық баланы қамтып отыр.
Махаллада экономикалық белсенділікті арттыру және халықты жұмыспен қамту мәселесіне де ерекше көңіл бөлінген. Бүгінде мұнда 70-тен астам кәсіпкерлік субъектісі жұмыс істейді. Бұл жұмыссыздықты азайтып, отбасылардың табысын арттыруға ықпал етуде. Атап айтқанда, махаллада 1 048 жастың 949-ы жұмыспен қамтылған.
Аумақта көгалдандыруды сақтау және көбейтуге де ерекше мән берілген. Осы мақсатта 2022 жылы экобақ құрылған. Шамамен 4,5 мың ағашы бар бұл саябақ бүгінде үлкен-кішіге бірдей сүйікті демалыс орнына айналған. Сонымен қатар махаллада әлеуметтік ортаны нығайтуға қызмет ететін «Ақсақалдар ордасы» да жұмыс істейді.
Мемлекет басшысы махаллада қауіпсіз ортаны қамтамасыз ету бағытында атқарылып жатқан жұмыстармен танысты. Қазіргі таңда тұрғын үйлердің кіреберістері бақылау камералары және күзет пульттерімен жабдықталған. Аумаққа кіріп-шығатын адамдар мен көлік құралдары заманауи технологиялар негізінде бақылауға алынған.
Президентіміз тұрғындар үшін жасалған жағдайларды көріп, махалла ақсақалдары мен белсенділерімен әңгімелесті. Көркейген, берекелі махалла қоғамның тірегі екенін атап өтіп, тыныштық, ынтымақ және әлеуметтік бірлікті нығайту әрдайым басты міндет болып қала беретінін жеткізді.
Мемлекет басшысы махаллада ұйымдастырылған «сумалак» мерекесіне қатысып, тұрғындармен және балалармен жүздесті. Сондай-ақ спорт алаңында жаттығып жүрген жастармен кездесіп, дене тәрбиесі мен салауатты өмір салтының тұлғаның жан-жақты қалыптасуындағы маңызын ерекше атап өтті.
