Ҳунарманд хонадони руҳини намойиш этувчи «Рисола» ҳунармандчилик уйи 1960 йилларда қурилган хушманзара ўзбек уйида жойлашган.

Ҳунармандчилик уйида Марказий Осиёнинг 15 дан ортиқ кулолчилик мактаблари ва Афғонистон кулолчилигини қамраб олган коллекция намойиш этилган музей, анъанавий кулолчилик, каштачилик ва гилам тўқиш устахоналари, Ўзбекистоннинг деярли барча марказлари намуналари ўрин олган кулолчилик буюмлари галереяси, миллий таомлар ва меҳмон қабул қилиш хоналари мавжуд.

«Рисола» ҳунармандчилик уйи туризм, ҳунармандчиликни ривожлантириш ҳамда ижтимоий соҳаларда фаолият юритади. Шунингдек, кам таъминланган аҳоли қатламларини ҳунарга ўргатиш орқали қўллаб-қувватлашни назарда тутади.

[gallery-25516]

«Рисола» ҳунармандчилик уйига ташриф буюрувчилар музей ва устахоналар бўйлаб экскурсия қилишлари, кулолчилик бўйича маҳорат дарслари, жумладан, шакл ясаш, сопол идишга нақш чизиш, ҳуштак ўйинчоқлар ясашлари мумкин.

Каштачилик, гилам тўқиш бўйича маҳорат дарсларида иштирок этиш имконияти яратилган.

Кулолчилик музейида Ўзбекистоннинг 15 дан ортиқ кулолчилик марказлари ва Афғонистон кулолчилик намуналари намойиш этилган. Бу ерда кулолчилик тарихи, мамлакатнинг турли кулолчилик марказлари фаолияти ҳамда мазкур фаолияти билан шуғулланиб келаётган Нарзуллаевлар сулоласининг 200 йиллик тарихи билан танишиш мумкин.

Гилам тўқиш устахонасида Ғиждувонда қайта тикланаётган ва ривожлантирилаётган бухоро ипак гиламлари намунаси намойиш этилган бўлиб, бу жараёнга сулоланинг ёрқин вакили — Маҳфузабону Нарзуллаева раҳбарлик қилмоқда.  

Меҳмонларга ипак иплари ва табиий бўёқлардан фойдаланган ҳолда ёғоч дастгоҳда гилам тўқиш жараёни намойиш этилади. Шу билан бирга, ҳудуддаги гиламчилик тарихи ҳақида ҳам маълумот берилади.

Каштачилик устахонасида Ғиждувон каштачилиги тарихи, унинг ўзига хос жиҳатлари ва техникаси билан танишиш мумкин. Шунингдек, усталар «босма» ва «юрма» услублардаги каштачилик жараёнини намойиш этиб беришади.

Кулолчилик галереясида Ўзбекистоннинг турли кулолчилик марказлари усталари томонидан яратилган асарлар кўргазмаси жой олган.

Гулноза Бобоева,  

Рустам Назарматов,(сурат)

ЎзА