Бугун пойтахт кўчаларини, истироҳат боғларини, кўнгилочар масканларини айланар экансиз барча жойда миллийлик тараннумини, инсонларнинг қувонч тўла чеҳраларини, атрофни ўраб турган баҳорий илиқликни ҳис этасиз. Бу муҳит қалбларни жунбушга келтириб, барчани байрам сари, кўнгилни бир оз ёзиб олиш учун чорлайди.

Масалан, пойтахт марказидаги “Дўстлик” боғи бугун ҳар қачонгиданда файзли гўшага айланган. Бир тарафда дошқозонларда сумалаклар қайнаб турибди, Тошкентнинг машҳур ошпазларидан Наврўзга бағишлаб паловхонтўра, иккинчи тарафда саҳналарда жўшқин куй-қўшиқлар, миллий ўйинлар, туман спортчиларининг чиқишлари, жажжи болажонларнинг қувноқ овозлари, хуллас барча-барчаси Наврўзнинг юқори ҳароратини сизга тортиқ қилади.  

Бундай кунларда айниқса қўл меҳнатида тайёрланган миллий ҳунармандчилик маҳсулотларига қизиқиш юқори бўлади. Ёшларни асрий анъана ва удумларимизга бўлган қизиқишларини кўриб ҳам  кўнгил кўтарилади.  

Айтиш керакки 20-21 март кунлари пойтахтнинг барча истироҳат боғлари, маҳаллаларида “Наврўз”га бағишланган турли кўнгилочар тадбирлар бўлиб ўтади. Масалан, “Наврўз” боғида қирқ хил таъмли сумалак дастури ва халқ сайли ташкил этилади. Унда дорбозларнинг чиқишлари, карнай сурнай садолари, куй қўшиқлар ва бир қанча кўнгилочар шоу дастурлари ўрин олган. Шунингдек, юртимиз меҳмонлари ва пойтахтликларни  “Aли бобо ва қирқ қароқчи” шоуси кутмоқда. Юлдузлар иштирокидаги концерт дастури барчани қувноқ ҳамда жўшқин байрамга чорлаб қолади.

<iframe width="640" height="420" src="https://www.youtube.com/embed/a6NRrm4xqpE" title="Пойтахт ҳудудларида Наврўз шукуҳи" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов, Аброр Содиқов, Улуғбек Тўхтаев (видео), ЎзА