Бугун Польшада мамлакат президенти сайловининг биринчи босқичида тегишли сайлов участкалари очилди.

Мамлакатда 29 миллиондан зиёд фуқаро овоз бериш ҳуқуқига эга. Улар жами 32 000 дан кўпроқ сайлов участкасига бориши мумкин.

Давлат раҳбари беш йил муддатга сайланади.

Сўровга кўра, кураш асосан Бош вазир Дональд Туск бошчилигидаги ҳукмрон фуқаролик коалицияси томонидан қўллаб-қувватланадиган Варшава мэри Рафал Тшасковский ва консерватив “Қонун ва адолат” партияси номзоди Карол Навроцкий ўртасида кечиши кутиляпти.

Овоз бериш маҳаллий вақт билан соат 21:00 да тугайди.

Илк норасмий натижа бугун кечқурун эълон қилинади.

Польшада президентлик сайлови икки босқичли тизимда ўтказилади: биринчи турда номзодларнинг ҳеч бири 50 фоиздан кўп овоз ололмаса, кейинги тур энг кўп овоз олган икки номзод ўртасида кечади. Эҳтимолий иккинчи босқич 1 июнга белгиланган.