“Янги Ўзбекистонда 2030 йилгача қишлоқ хўжалигининг ривожланиш стратегияси: имкониятлар ва истиқболлар” сессиясида иштирок этган Венгрия Картошкачилик илмий маркази директори Полгар Сзолт ЎзА мухбирига қишлоқ хўжалиги соҳасида ўзбек-венгр ҳамкорлигида олиб борилаётган лойиҳа истиқболи хусусида гапириб берди.
– Даставвал, Тошкентда ўтаётган ушбу муҳим халқаро анжуман – “маданий мерос ҳафталиги”га таклиф учун миннатдорчилигимни билдираман. Тадбирлар доирасида ташкил этилган қишлоқ хўжалиги сессиясида мамлакатингиз салоҳияти, ислоҳотлари хусусида батафсил маълумот берилди.
Мен йиғилишда Венгрия қишлоқ хўжалиги ва ҳаёт фанлари университети ҳамда бундан икки йил олдин ташкил этилган Ўзбекистон – Венгрия картошкачилик илмий-тадқиқот институти вакили сифатида иштирок этяпман. Венгрия картошкачилик селекционерлари, тадқиқотчилари кўмаги ва билими билан мамлакатингизда картошкачилик соҳасини ривожлантириш бўйича ҳамкорлик қилиб келяпмиз. Шу боис юртингизга ўз навларимизни жорий қилдик, картошка уруғчилигини йўлга қўйдик. Мазкур ҳамкорлик орқали Ўзбекистон картошка етиштириш маҳсулдорлиги ва рентабеллигини ҳақиқатан ҳам оширишимиз мумкин, деб ўйлаймиз.
Венгрия ва Ўзбекистон мутахассислари импорт ўрнини босиш мақсадида маҳаллий картошка уруғчилигини йўлга қўймоқчимиз, чунки мамлакатингиз картошка уруғини импорт қилишдан тўхташи керак. Ўтган йили мамлакатингиз 50 минг уруғлик картошка импорт қилган ва бундай савдони ҳар йили такрорлашга эҳтиёж пайдо бўлмоқда. Шунинг учун биз қисман бўлсада маҳаллий ишлаб чиқариш билан ушбу импортни камайтиришга эришишни кўзда тутганмиз, айнан ушбу мақсад лойиҳамизни ўзига хослигини таъминлайди.
Картошка жуда интенсив ўсимлик ва рентабелли ишлаб чиқариш учун кўп сармоя киритиш лозим. Аҳоли сони кўпайиб боряпти, картошкани соғлом ва экологик жиҳатдан тоза тарзда етиштириш учун асосий омил, албатта, уруғ чидамлилиги, зараркунандаларга қарши бардошли навга эга бўлишига боғлиқ.
Ўйлайманки, агар тўғри нав ва сифатли уруғ бўлса, у ҳолда атроф-муҳитни асраган ҳолда, пестицид ва кимёвий моддаларни камроқ ишлатиб, картошка етиштиришимиз мумкин. Картошка жуда интенсив ўсимлик ҳисобланади. Демак, яхши ҳосилдорликка эришиш учун бошиданоқ сифатли уруғлик ва яхши навга эга бўлсагина талаб ошади.
Беҳруз Худойбердиев, ЎзА