Пахтакорда қишга тайёргарлик: таълим муассасаларини иситиш ва ичимлик суви таъминоти
Қишнинг совуқ нафаси аввало иссиқликка муҳтож болалар даргоҳида, ичимлик сувига эҳтиёжманд хонадонларда, узлуксиз хизмат кўрсатиши шарт бўлган инфратузилма тизимларида сезилади. Шу боис куз-қиш мавсумига тайёргарликни биноларни кўздан кечириш, захираларни санаш ёки ҳисоботларни таққослаш билан баҳолаб бўлмайди. Унинг ҳақиқий мезони инсонларнинг кундалик ҳаётида акс этадиган амалий натижадир.
Жиззах вилояти Пахтакор туманида Республика ишчи гуруҳи ва туман ҳокимлиги вакиллари иштирокида таълим муассасалари ҳамда сув таъминоти тизимининг куз-қиш мавсумига шайлиги ўрганилди. Хусусан, 12-сонли мактабгача таълим ташкилоти ва 8-сонли мактабдаги иситиш тизимларининг техник ҳолати кўздан кечирилиб, аниқланган камчиликларни бартараф этиш бўйича масъулларга топшириқлар берилди.
Бу талаблар эса масъуллардан шунчаки тадбиркорликни эмас, тизимли ёндашувни, тезкорлик ва ижро интизомини тақозо этади.
Пахтакорда туман ҳокими ўринбосари Фарҳоджон Кубаев бошчилигидаги ишчи гуруҳнинг 12-сонли давлат мактабгача таълим ташкилотида ўтказган ўрганишлари ана шу жиҳатдан аҳамиятли бўлди.
Дастлаб муассасанинг иситиш тизими, қозонхоналарнинг техник ҳолати, мавжуд кўмир захираси кўздан кечирилди. Гуруҳ хоналаридаги ҳарорат, санитария шароитлари ва ёнғин хавфсизлиги талабларига риоя этилишига эътибор қаратилди.
Аслида, мактабгача таълим ташкилотидаги ҳар бир техник масала ортида болалар саломатлиги ва хавфсизлиги билан боғлиқ масъулият мужассам. Иситиш тизимидаги кичик носозлик ҳам совуқ кунларда болалар учун ноқулай шароитни юзага келтириши мумкин. Демак, бу ерда масала мавжуд ускуналарни ишлатиш билангина чекланмайди, балки эҳтимолий муаммоларнинг олдини олиш, мавсум давомида барқарор ишлашни таъминлашдан иборат.
Ишчи гуруҳ аъзолари ўрганиш давомида аниқланган камчиликларни тезкор бартараф этиш юзасидан соҳа масъулларига аниқ вазифалар юклади.
Бироқ қишга тайёргарлик фақат таълим муассасаларидаги иссиқлик таъминоти билан ўлчанмайди. Аҳолининг турмуш сифатига бевосита таъсир кўрсатадиган яна бир муҳим йўналиш ичимлик суви таъминотидир.
Тумандаги сув таъминоти корхонаси ва куз-қиш мавсумига тайёргарлик штаби фаолиятини ўрганиш жараёнида ҳам масаланинг шу жиҳатларига эътибор қаратилди. Туман ҳокими ўринбосари сув етказиб бериш сифати, таъминот узлуксизлиги ҳамда эҳтимолий фавқулодда вазиятларга тайёргарлик масалаларини таҳлил қилди.
Бу бежиз эмас. Чунки сув таъминотидаги ҳар қандай узилиш, аввало, аҳолининг кундалик эҳтиёжларига таъсир кўрсатади. Айниқса, мавсумий шароит оғирлашган даврда тизимнинг ҳар бир бўғини ишончли ишлаши, юзага келиши мумкин бўлган носозликларга тезкор чора кўриш имконияти мавжуд бўлиши зарур.
Шу маънода, сув таъминоти корхонаси фаолиятини ўрганишни фақат мавсумий назорат тадбири сифатида эмас, балки аҳоли манфаатларига хизмат қиладиган инфратузилма барқарорлигини баҳолаш сифатида ҳам тушуниш лозим.
Бугун бу йўналишдаги вазифалар давлат сиёсати даражасида ҳам устувор аҳамият касб этмоқда. Жумладан, Ўзбекистон Республикаси Президентининг 2024 йил 24 июлдаги “Ичимлик суви таъминоти ва оқова сув тизимини янада яхшилашга қаратилган қўшимча чора-тадбирлар тўғрисида”ги фармонида 2026-2027 йилларда соҳани комплекс ривожлантириш, сув таъминоти барқарорлигини ошириш ва инфратузилмани модернизация қилишга қаратилган вазифалар белгиланган.
Бу вазифаларнинг ҳудудлардаги ижроси эса, аввало, мавжуд тизимларнинг ишончлилиги, хизматлар сифати ва аҳоли эҳтиёжларига ўз вақтида муносабат билдиришда намоён бўлади. Зеро, ҳар қандай ислоҳотнинг амалий қиймати одамлар ҳаётида сезилган ўзгариш билан ўлчанади.
Пахтакор туманидаги ўрганишлар таълим тизимидаги яна бир муҳим бўғин – 8-сонли умумтаълим мактабини ҳам қамраб олди. Туман ҳокими ўринбосари Ф.Кубаев бошчилигидаги ишчи гуруҳнинг тунги ўрганишлари давомида муассасанинг куз-қиш мавсумига тайёргарлиги кўздан кечирилди.
Иситиш тизими, синфхоналардаги ҳарорат, электр энергияси таъминоти ва хавфсизлик ҳолатига алоҳида эътибор қаратилди. Аниқланган камчиликларни бартараф этиш, ўқувчилар учун зарур шароитларни яратиш юзасидан масъулларга тегишли вазифалар юклатилди.
Бу ерда ҳам масаланинг моҳияти оддий: мактаб эшиклари очиқ тургани билан унинг мавсумга тайёрлиги таъминланган ҳисобланмайди. Ўқувчи синфхонага кирганида ўзини қулай ва хавфсиз муҳитда ҳис қилиши, таълим жараёни об-ҳаво шароитидан қатъи назар, белгиланган тартибда давом этиши керак. Бу эса муассаса раҳбарияти ва соҳавий масъулларнинг кундалик эътибори ҳамда назоратини талаб этади.
Эътиборлиси, ўрганишлар учта муҳим йўналишни қамраб олди. Булар мактабгача таълим, умумий ўрта таълим ва сув таъминоти тизимидир. Уларни бирлаштириб турган мақсад эса битта. Бу – аҳоли учун муносиб шароит яратиш ва хизматлар барқарорлигини таъминлаш.
Аммо шу ўринда муҳим бир жиҳатни унутмаслик лозим: ўрганиш давомида берилган топшириқлар бажарилган тақдирдагина ўзининг амалий қийматига эга бўлади. Акс ҳолда, аниқланган камчиликлар яна такрорланиши, мавсумнинг энг масъулиятли палласида аҳоли дуч келадиган муаммолар сақланиб қолиши мумкин.
Шу боис Пахтакор туманидаги ўрганишларнинг мантиқий давоми сифатида белгиланган вазифалар ижросини назорат қилиш, аниқланган камчиликларнинг бартараф этилганини амалда текшириш ва натижаларни баҳолаш муҳимдир.
Қиш мавсумида ҳисоботлардан кўра, иссиқлик ва электр таъминотининг барқарорлиги, тоза ичимлик суви етказиб берилиши муҳимроқдир. Аҳоли учун тайёргарликнинг асосий кўрсаткичи ҳам айнан шу омиллар билан белгиланади.
Абдужалол Қаюмов,
ЎзА мухбири
