Берилган совғани қайтариб олиш одобдан эмас, дейишади. Франциялик депутат эса бу қоидага амал қилмоқчи эмас. Гап 1880 йил фаранг ҳукумати томонидан Америка Қўшма Штатларига совға қилинган “Озодлик” ҳайкали ҳақида боряпти. Нью-Йорк шаҳридаги бу ёдгорлик бутун дунёга машҳурлигини ҳамма билади. Нега энди орадан 140 йил ўтиб, Рафаэль Глюксманн совғани қайтариш керак, деяпти?

Унинг айтишича, Трамп маъмурияти мустақил изланишни чеклаб, илмий тадқиқотчиларни ишидан мосуво қилишга уринмоқда. Илмий-тадқиқот институтларига ажратиладиган маблағни қисқартириб, илм-фанга, демократик тамойилларга ҳурматсизлик кўрсатмоқда.

– Эҳтимол Трамп маъмуриятининг бу ўзбошимчалиги Францияга қўл келиб қолар, – дея фикр билдирган ноиб.

Яъни, жаноб Глюксманн АҚШда илм изловчиларга нисбатан кузатилаётган босимдан унумли фойдаланиб, “Билимли одамлар ҳамма жойда керак” дея олимларни Францияга таклиф қилиш лозимлигига шама қилган. Шу воқеалар сабаб депутат озодлик ва демократия рамзи ҳисобланган ҳайкал энди Трамп  маъмурияти олиб бораётган сиёсатга мос келмаслигини иддао қилган.

– “Озодлик”ни уйига қайтаринг, уни хор қилдингиз, деди Рафаэль АҚШга қарата.

Шунингдек, Глюксманн партиядошлари билан суҳбатда Франциядаги ўта ўнг етакчиларни ҳам танқид қилиб, Трамп ва унинг миллиардер маслаҳатчиси Илон Маск мухлисларига айланганликда айблади.

<iframe width="650" height="420" src="https://www.youtube.com/embed/GEbKJ64WIu0" title="«Ozodlik »ni qaytaring" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

К.Бекжонов, ЎзА