Шу йил 23-26 февралда йирик инновация ва стартап тадбири – “Qatar Web Summit 2025”да экспонент сифатида иштирок этган Ўзбекистоннинг етакчи венчур студияси “Startup Garage” Қатарнинг Доҳа шаҳрида идорасини очди.
Марказий Осиёдан MENA – Яқин Шарқ ва Шимолий Африка минтақасида фаолияти юрита бошлаган бу илк корхона икки минтақа ўртасидаги алоқаларни мустаҳкамлаб, тадбиркорлар учун янги имкониятлар очади.
Бир вақтнинг ўзида бир неча стартап ярата оладиган венчур студиялари, одатда, янги стартапларни ишлаб чиқиш ва ишга тушириш учун бирга ишлайдиган тажрибали тадбиркорлар ва экспертлар жамоасини бирлаштиради.
Муҳаммад Халил томонидан асос солинган “Startup Garage” бор-йўғи саккиз ойда республикамизнинг барча ҳудудларида фаолиятини йўлга қўйди.
Корхона янги иш бошлаган тадбиркорларга “AloqaVentures” томонидан қўллаб-қувватланадиган менторлик, молиялаштириш ва стратегик йўл-йўриқ кўрсатади. Энди Яқин Шарққа қараб кенгайган жамоа ўзбек стартаплари MENA бозорига кириши учун дарвоза вазифасини бажариб, шунингдек Марказий Осиё сари юриш ниятидаги хорижий ҳамкор стартапларга ҳам кўмаклашади.
– Фаолиятимиз кенгайиши икки минтақани боғлаш йўлидаги муҳим қадамдир, – дейди Муҳаммад Халил. – Ўзбекистонда кучли ҳукумат, илғор ташаббуслар, қулай сиёсий муҳит, шунингдек инвесторлар ишончи ортиб бораётган, тез ўсаётган стартап экотизими мавжуд. MENA ҳудудига кириш орқали биз инновация, инвестиция ва бозорни кенгайтириш учун икки томонлама канал яратяпмиз. Вазифамиз – стартаплар таъсир доирасини мунтазам кенгайтириш учун зарур бўлган ресурслар билан таъминлаш.
Президент ташаббуси орқали “Ёшлар банки” сифатида танилган “Aloqa Ventures” томонидан қўллаб-қувватланадиган “Startup Garage” Ўзбекистон стартап экотизимини илгари сурмоқда. Ёшлар бошчилигидаги мазкур лойиҳалар учун 200 миллион доллар йўналтирилган. Ҳозиргача 100 дан зиёд маҳаллий стартап қўллаб-қувватланди. Шундан 10 таси хориждан молиялаштириш жараёнида, 3 таси қарийб миллион доллар қийматга тенг мажбурият олган.
Президент кўрсатмасига мувофиқ, резидент стартаплар ўсишни тезлаштириш учун 10 000 долларгача сармоя олиш имконига эга. Демак, “Startup Garage” таъсири тобора кенгаймоқда.
– Бу янгилик ҳар икки минтақадаги стартаплар учун мисли кўрилмаган имкониятлар очишига ишонамиз, – деди “Aloqa Ventures” бошқарувчи ҳамкори Суҳроб Ғайбуллоев. – Ўзбекистон ва MENA ҳамкорлигида улкан салоҳият мавжуд. Умуман, минтақавий инновация ва иқтисодий ўсишга туртки берадиган ушбу ташаббусни қўллаб-қувватлашдан мамнунмиз.
Ушбу корхона салоҳиятли стартапларни инкубация қилиш, минтақавий акселератор дастурларини ишга тушириш ва минтақасидаги инвесторлар, давлат идоралари ва корпоратив тузилмалар билан ҳамкорлик ўрнатишга кўпроқ эътибор қаратади.
Стратегик қўллаб-қувватлаш, мураббийлик ва капиталдан фойдаланиш имкониятини тақдим этиш орқали стартаплар имкониятини кенгайтиришга ихтисослашган мамлакатимиздаги биринчи венчур студия – “Startup Garage” юртимиз тадбиркорлари янги авлодини тарбиялашда муҳим ўрин тутади. Марказий Осиё ва Яқин Шарқ трансчегаравий стартапларини ривожлантириш, инвестиция ва технологик ҳамкорликни кучайтиришга интилади.
Муҳаррама Пирматова, ЎзА