Ўзбекистон Республикасининг Жидда шаҳридаги Бош консули Нодиржон Турғунов Ислом ҳамкорлик ташкилоти ахборот агентликлари иттифоқи - UNA бош қароргоҳида Бош директор вазифасини бажарувчи Муҳаммад Абд Раббо Ал-Ямий билан учрашди. Бу ҳақда UNA манбаларида маълум қилинди.

Мулоқот чоғида Ўзбекистон Бош консулига иттифоқнинг аъзо давлатлар учун асосий медиа-майдон сифатидаги роли, шунингдек, соҳани ривожлантириш истиқболи, келгуси йилларга мўлжалланган ҳаракатлар режаси ҳақида маълумотлар берилди. Айни йўналишдаги фаолият шаффофлик, ўзаро ишонч тамойилига, бағрикенгликка ундайдиган исломий қадриятларга асослангани таъкидланди.

Бош консул Иттифоқнинг мавжуд алоқани, оммавий ахборот воситалари ходимлари ўртасидаги касбий риштани янада мустаҳкамлашдаги ролини юқори баҳолаб, мамлакатимиз ҳамкорликни кенгайтиришдан манфаатдор эканини маълум қилди.

Муҳаррама Пирматова, 
ЎзА