Хитойнинг Ҳунан провинцияси вице-губернатори Ван Жуншоу бошчилигида делегация Ўзбекистонга ташриф буюрди. Ташриф давомида Zoomlion Agriculture Machinery Co., Ltd. (Хитой) ва ""Oxus Machinery" компаниялар гуруҳи (Ўзбекистон) ўртасида технологик ҳамкорлик тўғрисида келишув имзоланди ҳамда Zoomlion тракторларини мамлакатда маҳаллийлаштириш дастурининг учинчи босқичи тантанали равишда очиб берилди.
Ишлаб чиқариш жараёни учун платформа сифатида "Profmetservice" МЧЖ танланди. Ушбу корхона "Oxus Machinery" гуруҳига қарашли компаниялардан биридир.
Ҳамкорлар ишлаб чиқаришни маҳаллий фермерлар эҳтиёжлари, Ўзбекистоннинг тупроқ-иқлим шароитлари ҳамда агротехнологияларини инобатга олган ҳолда йўлга қўймоқда.
Дастур доирасида 2024 йилда мамлакат бўйлаб кенг кўламли хўжалик синовлари ўтказилган. Бу синовлар қайси турдаги тракторлар қишлоқ хўжалиги учун энг мақбул эканини аниқлаш, уларнинг техник конфигурациясини ишлаб чиқиш ва ишончлилигини текширишга қаратилган эди. Натижаларга кўра, турли агротехнологик жараёнларга мос келувчи қувват қатори, модель ва конфигурациялар танлаб олинди.
2025 йилнинг биринчи чорагида дастур ишлаб чиқариш босқичига ўтди. Шу даврда 80 от кучи, 160 от кучи ва 200 от кучига эга бўлган учта моделнинг илк партияси ишлаб чиқарилди.
Ҳозирги – учинчи босқич эса тракторларни чуқур маҳаллийлаштиришни назарда тутади. Бу жараёнда двигатель, трансмиссия, кабина каркаси ва элементлари, гидравлика, электр ва пневматика тизимлари каби асосий агрегат ва бутловчи қисмлар маҳаллий корхоналар билан ҳамкорликда ишлаб чиқарилади.
2025 йил август ойининг охирига қадар Zoomlion RS 1604 (160 от кучи) тракторининг биринчи нусхаси ишлаб чиқарилиши режалаштирилган. Шунингдек, йил охиригача яна икки модель – Zoomlion RC 804 (80 от кучи) ва Zoomlion RG 2004 (200 от кучи) ишлаб чиқаришга жорий этилиши кутилмоқда.
Заводнинг йиллик ишлаб чиқариш қуввати 1 000 дона тракторни ташкил этади. Ишлаб чиқариш жараёни Zoomlion компанияси тақдим этган технологиялар ва сифат назорати асосида олиб борилади.
Шу билан бирга, техника сотилгандан кейинги хизмат кўрсатиш ҳам йўлга қўйилади. "Oxus Machinery" МЧЖ мамлакат бўйлаб кенг тармоқ орқали кафолатли таъмирлаш, техник хизмат ва эҳтиёт қисмлар таъминотини амалга оширади.
ЎзА