Пойтахтимизда “Ўзбекистонда Германия иқтисодиёти куни” анъанавий конференцияси ўтказилди.

Германия иқтисодиётининг Марказий Осиёдаги ваколатхонаси томонидан ташкил этилган тадбирда икки мамлакатнинг 300 дан зиёд етакчи бизнес ва ишбилармон доира вакиллари, экспертлар, вазирлик ва идоралар раҳбарлари иштирок этди. 

Германия Ўзбекистоннинг Европа Иттифоқи мамлакатлари орасидаги етакчи савдо-иқтисодий ва инвестициявий ҳамкорларидан. Икки давлат ўртасидаги муносабатлар кейинги йилларда кенг кўламда ривожланмоқда. Бугунги кунга келиб Ўзбекистонда немис компаниялари иштирокида амалга оширилган ва истиқболли лойиҳаларнинг умумий портфели 20 миллиард евродан ошган. Улар энергетика, кимё, тоғ-кон саноати, машинасозлик, тўқимачилик, озиқ-овқат саноати, қишлоқ хўжалиги, транспорт ва логистика, қурилиш материаллари ишлаб чиқариш йўналишларини қамраб олади. Олмон давлатининг етакчи ишлаб чиқарувчилари – “Deutsche Kabel”, “Knauf”, “Claas”, “Papenburg” ва “Falk Porsche” муқим жойлашган. “Siemens”, “BASF”, “Thissen Group”, “Roland Berger”, “Adidas Group” каби машҳур компаниялар билан ҳамкорлик йўлга қўйилган. 

[gallery-20548]

Конференцияда Германия Федератив Республикасининг мамлакатимиздаги Фавқулодда ва мухтор элчиси Манфред Хутерер иштирок этиб, икки давлат ўртасидаги ўзаро манфаатли ҳамкорликнинг истиқболлари хусусида сўз юритди. Ўтган йили Берлинда ўтказилган олий даражадаги учрашувлар ҳамда жорий йилнинг сентябрь ойида Германия Федератив Республикаси Федерал Канцлери Олаф Шольцнинг мамлакатимизга расмий ташрифи ҳамкорлик алоқаларини янада кенгайтиришга хизмат қилиши билан аҳамиятли эканини қайд этди. 

Анжуманда икки давлат иқтисодий муносабатларининг имкониятлари ва истиқболли лойиҳалар муҳокама этилди. 

“Малакали кадрларни ривожлантириш учун шароит яратиш” ҳамда “Глобал ўзгаришлар шароитида янги логистика ечимлари” мавзуларида маърузалар тингланди. Мавзунинг долзарб жиҳатлари бўйича ўзаро фикр алмашилди.

– Мен асли Қозоғистонликман, – дейди Ўзбекистондаги “RSP International” компанияси Бош директори Виктория Слета. – Қозоғистон ҳамда Россияда бизнес юритиш бўйича тажрибага эгаман. Ўзбекистонни ўрганиш имконияти насиб этди. Икки йилдан буён ушбу минтақада фаолият юритамиз. Компаниямиз Ўзбекистондаги халқаро сармоядорларга ҳуқуқий маслаҳат бериш хизматлари билан шуғулланади. 

Иштирокчилар шунингдек, ўзаро тажриба алмашиш, инвестициялар ва бизнес ҳамкорлик соҳасидаги лойиҳаларни тақдим этиш, янги бизнес алоқаларни ўрнатиш имкониятига эга бўлди. 

Камола ЮСУПОВА, Ойбек ПАРДАЕВ (сурат), ЎзА