Ўзбекистон ва Ҳиндистон стратегик муҳим минераллар соҳасидаги ҳамкорликни чуқурлаштирмоқда
Ҳиндистоннинг “The Economic Times” нашри Ҳиндистон ва Ўзбекистон ўртасида тоғ-кон саноати соҳасидаги ҳамкорликни кенгайтиришга бағишланган мақола чоп этди.
Материалда икки давлат геология ресурслари ва уран соҳасидаги шерикликни чуқурлаштиришга келишиб олгани қайд этилган. Томонлар, шунингдек, ўта муҳим минералларни қидириш ва ўзлаштириш бўйича умумий имкониятларни муҳокама қилган.
Нашр мамлакатлар ўртасида тоғ-кон саноати ва геология ресурслари бўйича англашув меморандуми шартлари келишиб олинганига эътибор қаратган. Айни пайтда ушбу ҳужжатни тезроқ қабул қилиш ҳамда режани аниқ лойиҳага айлантириш йўллари кўриб чиқилмоқда.
Ҳиндистон Ташқи ишлар вазирлигининг Ғарбий ишлар бўйича котиби Сиби Жорж матбуот анжуманида маълум қилишича, келишувни имзолаш ва амалга ошириш учун делегациялар алмашинуви йўлга қўйилади. Шунингдек, муаллиф махсус комиссия механизми орқали умумий саъй-ҳаракатларни ривожлантириш ғояси илгари сурилаётганини таъкидлайди.
“The Economic Times” уран йўналишидаги ҳамкорликка алоҳида эътибор қаратди. Мазкур соҳа иқтисодий алоқаларнинг янги йўналиши сифатида кўрсатилган. Қишлоқ хўжалигида ҳам шериклик кўлами кенгаяётгани қайд этилган. Хусусан, уруғчилик, томчилатиб суғориш, боғдорчилик ва шўрланган шароитда экин етиштириш бўйича ҳамкорликдаги ишлар ривожлантирилади.
Ҳиндистон қишлоқ хўжалиги тадқиқотлари кенгаши ҳамда мамлакатимиз Қишлоқ хўжалигида билим ва инновациялар миллий маркази бу борада ҳамкорликни йўлга қўймоқда.
Ўрош Оқбоев, ЎзА
